İDMAN
“Gəncə”nin baş məşqçisi: Yeni mövsüm gərgin idman mübarizəsi vəd edir
Bakı, 27 oktyabr, AZƏRTAC
“Azərbaycan Yüksək Liqasının yeni mövsümü gərgin idman mübarizəsi vəd edir. Altı komanda medallar uğrunda mübarizə aparacaq. Demək olar ki, beş komanda da eyni səviyyəli, güclü kollektivdir”.
AZƏRTAC xəbər verir ki, bu sözləri “Gəncə” voleybol komandasının baş məşqçisi Sergey Çasnavitski klubun mətbuat xidmətinə komandaların Azərbaycan Yüksək Liqasının 2023-2024-cü il mövsümünə hazırlığını dəyərləndirərkən deyib.
Mütəxəssis qadın voleybolçulardan ibarət komandalar arasında Azərbaycan Yüksək Liqasında mübarizə aparacaq klubların hamısının oyununu izlədiyini bildirib: “Ancaq iki komanda ilə yoldaşlıq oyunumuz olub. Həmin komandalar haqqında fikir yürüdə bilərəm. Onu da nəzərə almaq lazımdır ki, həmin komandalar da hazırlıq proseslərini hələ başa vurmayıblar və pik formalarına çatmayıblar. “Azərreyl” klubunun isə avrokubok matçlarını izləmişəm. Rəqibləri qiymətləndirmək çox çətindir. Rəqib komandalarda heyətin formalaşdırılması istiqamətində işlərin aparıldığı və güclü legionerlər transfer etdiklərini bilirəm”.
Onun sözlərinə görə, komandalar hələ də transfer işlərini davam etdirirlər: “Güclü voleybolçuların axtarışı komandaların gündəmindədir. Bu səbəbdən komandalar haqqında fikir söyləmək o qədər də asan deyil”.