Gənclər Akademiyasının sədri: AMEA-nın beynəlxalq elmi əməkdaşlığı innovativ layihələrin təşviqinə töhfə verir
Bakı, 21 iyul, AZƏRTAC
Son illərdə Azərbaycan Milli Elmlər Akademiyası (AMEA) beynəlxalq elmi əməkdaşlığın genişləndirilməsi istiqamətində həyata keçirdiyi ardıcıl fəaliyyətlə Azərbaycanın qlobal elmi məkana inteqrasiyasına töhfələr verir. Nüfuzlu beynəlxalq elmi qurumlar və akademik platformalarla tərəfdaşlıqların inkişafı, yeni əməkdaşlıq mexanizmlərinin yaradılması və birgə elmi təşəbbüslərin dəstəklənməsi ölkənin elmi potensialının beynəlxalq səviyyədə tanıdılmasına, habelə elmi diplomatiyanın gücləndirilməsinə xidmət edir.
Bu barədə AZƏRTAC-a açıqlamasında AMEA Gənclər Akademiyasının sədri kimya üzrə fəlsəfə doktoru, dosent Elmir Babayev söyləyib.
Sədr bildirib ki, AMEA-nın son illərdə Beynəlxalq Elmi Şura (ISC), Asiya Elmlər Akademiyaları və Elmi Cəmiyyətləri Assosiasiyası (AASSA) və Akademiyalararası Tərəfdaşlıq Assosiasiyasına (IAP) üzv qəbul edilməsi Akademiyanın beynəlxalq elmi şəbəkələrdə iştirak imkanlarını genişləndirib, qlobal elmi əməkdaşlıq platformalarında mövqeyini daha da möhkəmləndirib. Akademiyanın Çin Xalq Respublikasının elmi mühiti ilə inkişaf etdirdiyi əlaqələr isə elmi diplomatiyanın strateji və çoxtərəfli xarakterini əks etdirir. Çin Sosial Elmlər Akademiyası, Hebey Sosial Elmlər Akademiyası, Honkonq Kore Akademiyası, Pekin Xarici Dillər Universiteti və Hebey Pedaqoji Universiteti ilə imzalanmış əməkdaşlıq memorandumları iki ölkənin elmi müəssisələri arasında uzunmüddətli institusional tərəfdaşlığın formalaşdırılmasına, birgə tədqiqatların və akademik mübadilənin genişlənməsinə əlverişli zəmin yaradıb.
Vurğulanıb ki, AMEA-nın beynəlxalq əməkdaşlıq coğrafiyası yeni tərəfdaşlıqlarla daha da genişlənməkdədir. Bu günlərdə Azərbaycan Milli Elmlər Akademiyasının Rəyasət Heyətində AMEA ilə Albaniya Elmlər Akademiyası arasında əməkdaşlığa dair anlaşma memorandumunun imzalanması bu istiqamətdə atılmış növbəti mühüm addımdır. Memorandum iki ölkənin elmi qurumları arasında institusional əlaqələrin möhkəmləndirilməsini, birgə elmi tədqiqatların həyata keçirilməsini, alimlərin və gənc tədqiqatçıların qarşılıqlı mübadiləsini, eləcə də elmi bilik və təcrübənin paylaşılmasını nəzərdə tutur.
AMEA-nın həyata keçirdiyi beynəlxalq əməkdaşlıq siyasəti yalnız memorandumların imzalanması ilə məhdudlaşmır. Bu fəaliyyət Azərbaycanın beynəlxalq elmi nüfuzunun yüksəldilməsinə, ölkə alimlərinin beynəlxalq layihələrdə iştirak imkanlarının genişləndirilməsinə, innovativ tədqiqatların təşviqinə və elmi potensialın inkişafına töhfə verir. Eyni zamanda, Azərbaycan haqqında obyektiv akademik biliklərin beynəlxalq elmi ictimaiyyətə çatdırılması, ölkənin zəngin elmi irsinin və müasir elmi nailiyyətlərinin tanıdılması baxımından da xüsusi əhəmiyyət daşıyır.
Elmir Babayev bildirib ki, AMEA-nın beynəlxalq nüfuzunun artmasının mühüm göstəricilərindən biri Akademiyanın 80 illik yubileyi münasibətilə keçirilən beynəlxalq tədbirdə müxtəlif ölkələrdən nüfuzlu alim və akademik qurum rəhbərlərinin iştirakıdır. Bu, Azərbaycanın qlobal elmi məkana uğurlu inteqrasiyasını və beynəlxalq elmi əməkdaşlıqda mövqeyinin güclənməsini nümayiş etdirir.
AMEA bundan sonra da beynəlxalq elmi tərəfdaşlıqların genişləndirilməsi, elmi diplomatiyanın inkişafı və Azərbaycanın dünya elmində mövqeyinin daha da möhkəmləndirilməsi istiqamətində fəaliyyətini davam etdirəcək.
Bölmənin digər xəbərləri
