GƏNCLƏR, İDMAN VƏ TURİZM İDARƏSİNİN RƏİSİ CAVİD OSMANOVUN ÇIXIŞI
- Möhtərəm cənab Prezident!
İcazə verin, qədim Şirvanın barlı-bərəkətli bölgələrindən birinə, özünəməxsus zəngin mədəniyyəti, ənənələri olan Ağdaşa Azərbaycan Respublikasının Prezidenti kimi ilk tarixi səfərinizin başlanması münasibətilə gənclərimiz adından Sizi ürəkdən və hərarətlə salamlayım, bir daha “Xoş gəlmisiniz!” deyim.
Bu gün qədim Ağdaşda böyük bayramdır. Rayonumuzun gəncləri isə unudulmaz günlərdən birini yaşayırlar. Ümummilli lider Heydər Əliyev məktəbinin layiqli yetirməsi və çox qiymətli yadigarı, çoxdan bəri gözlədiyimiz cənab İlham Əliyev bu gün Ağdaşın ən ali qonağıdır.
Cənab Prezident!
İş cədvəlinizin gərgin olmasına baxmayaraq, vaxt tapıb rayonumuza təşrif buyurduğunuza görə Sizə bir daha səmimi minnətdarlıq hisslərimi çatdırıram.
Möhtərəm cənab Prezident!
Azərbaycan gəncliyinə yaxşı məlumdur ki, ümummilli liderimiz Heydər Əliyevin hakimiyyətdə olduğu illər ərzində gənclərin qarşılaşdığı problemlərin həlli, onların hərtərəfli inkişafı sahəsində ardıcıl və məqsədyönlü iş aparılmışdır. Gənclər siyasəti dövlət müstəqilliyimizin möhkəmləndirilməsi yolunda prioritet istiqamətlərdən birinə çevrilmişdir.
Gənclər, İdman və Turizm Nazirliyinin yaradılması isə ölkədə fəal gənclər siyasətinin aparılmasında mühüm amil olmuşdur. Ulu öndərimizin Azərbaycana rəhbərliyi dövründə gənclərlə bağlı imzalanan fərman və sərəncamlar, “Azərbaycan gəncləri günü”nün təsis edilməsi dövlətin gənclər siyasətinə diqqətinin aydın göstəricisidir.
Ümummillli liderimizin idmana verdiyi böyük önəm ölkəmizdə bu sahənin inkişafında ciddi dönüş yaratmışdır. Sizin 1997-ci ildə Milli Olimpiya Komitəsinə prezident seçilməyinizlə bu qurumun fəaliyyətində yeni bir dövr başlanmışdır. Sizin məqsədyönlü fəaliyyətiniz nəticəsində son illər idmana və idmançılara göstərilən dövlət qayğısı daha da artmaqdadır.
Azərbaycan idmançılarının Olimpiya oyunlarında, dünya və Avropa səviyyəli yarışlarda uğurlu nəticələri qəlbimizdə haqlı qürur hissi doğurur. Ölkəmizin hər yerində Sizin diqqət və qayğınız sayəsində idman qurğularının tikintisi dönməz xarakter almışdır. Bu mənada Ağdaş rayonunda da mühüm işlər görülür. Son üç il ərzində rayondakı mövcud idman qurğularının bərpası, kütləvi yarışların və spartakiadaların keçirilməsi ənənə halı almışdır.
Gənclər, İdman və Turizm Nazirliyi ilə sıx qarşılıqlı əlaqələrimizin nəticəsidir ki, hər il bu qurum tərəfindən keçirilən tədbirlərin ünvanlarından biri də bizim rayonumuz olur. Rayonun əlaqədar təşkilatları da idmançılara hərtərəfli qayğı göstərirlər.
Gənclərin asudə vaxtının səmərəli təşkili üçün mühüm tədbirlər həyata keçirilir. Eyni zamanda, son illər rayon gənclərinin ən layiqli nümayəndələrinə böyük etimad göstərilir. İcra hakimiyyətindən başlayaraq, digər strukturlara qədər gənclərin rəhbər vəzifələrə təyin edilməsi daim diqqət mərkəzindədir.
Hazırda rayonun bütün inzibati ərazi mərkəzlərində çevik gənclər təşkilatları fəaliyyət göstərir. Onlar rayonun ictimai-siyasi həyatında aparıcı qüvvəyə çevrilmişdir. Gənclərimizin YAP ətrafında təşkilatlanması sahəsində də mühüm uğurlar qazanılmışdır. Bu gün rayonumuzun ictimai-siyasi həyatını gənclərsiz təsəvvür etmək mümkün deyildir.
Rayonda aparılan abadlıq və quruculuq işləri şəhərimizin simasına xüsusi görkəm vermişdir. Cəsarətlə deyirəm ki, Ağdaş hazırda bölgənin ən abad və yaraşıqlı şəhərlərindən birinə çevrilmişdir.
Cənab Prezident!
Mənim üçün yaranmış nadir fürsətdən istifadə edərək, şəhər stadionunun yenidən qurulması üçün göstərdiyiniz köməyə görə Ağdaş gəncləri adından Sizə dərin təşəkkürümüzü bildirirəm.
Cənab Prezident!
Xalqımız Sizin daxili və xarici siyasətinizi ürəkdən bəyənir və müdafiə edir. Sizin uğurlarınızın əsasında Heydər Əliyev yolu, siyasəti dayanır. Məhz buna görə də xalq Sizə inanır və ətrafınızda sıx birləşmişdir.
Heydər Əliyev siyasətinin ali məqsədlərindən biri müstəqil dövlətçiliyimizi inkişaf etdirmək və xalqın güzəranını yaxşılaşdırmaqdır. Bu istiqamətdə Sizin uğurlarınız yetərincədir. Yolunuz düz və aydındır. Biz gənclər Sizə inanırıq, köməyimizə və enerjimizə güvənə bilərsiniz.
Möhtərəm cənab Prezident, müstəqil Azərbaycanın tərəqqisi naminə yorulmaz fəaliyyətinizdə Sizə böyük uğurlar arzulayırıq. Bölgəmizə ilk səfəriniz uğurlu, qədəmləriniz sayalı olsun.
Heydər Əliyevin ideyalarına sadiq qalaraq, Sizin ətrafınızda sıx birləşməyə and içirik!
Yaşasın müstəqil Azərbaycan Respublikasının Prezidenti cənab İlham Əliyev!
Yaşasın müstəqil Azərbaycan!
Heydər Əliyev yolu ilə irəli!
X X X
Ağdaşda görüşlərini başa çatdıran Azərbaycan Prezidenti İlham Əliyev iyulun 7-də Göyçay rayonuna gəldi.
Dövlətimizin başçısı “Göyçay-Konserv” Açıq Səhmdar Cəmiyyətinin, “Kərpic-San LTD” Məhdud Məsuliyyətli Cəmiyyətinin, “Göyçay-Süd” Açıq Səhmdar Cəmiyyətinin istehsal müəssisələrində, Heydər Əliyev seyrəngahında oldu, rayon ictimaiyyətinin nümayəndələri ilə görüşdü.
(Göyçay rayonuna səfər barədə geniş hesabat qəzetin növbəti nömrəsində dərc olunacaqdır).
Bölmənin digər xəbərləri
