GƏNCLƏR VƏ İDMAN NAZİRİ DÖVLƏT SƏRHƏD XİDMƏTİNİN “N” SAYLI HƏRBİ HİSSƏSİNDƏ OLMUŞDUR
AZƏRTAC xəbər verir ki, iyunun 25-də Azərbaycan Silahlı Qüvvələrinin yaranmasının ildönümü münasibətilə gənclər və idman naziri Azad Rəhimov Dövlət Sərhəd Xidmətinin “N” saylı hərbi hissəsinin əsgər və zabit heyəti ilə görüşmüşdür.
Sahil Mühafizəsinin sərhəd-gözətçi gəmisinin göyərtəsində keçirilən təntənəli tədbirdə Azad Rəhimov, Dövlət Sərhəd Xidmətinin rəis müavini, Sahil Mühafizəsinin rəisi, general-mayor İlham Mehdiyev əsgər və zabit heyətini əlamətdar gün münasibətilə təbrik edərək, 2007-ci il ərzində “Gənclər ili” çərçivəsində hərbi hissələrdə bu cür görüşlərin davam edəcəyini bildirmişlər.
Vurğulanmışdır ki, ulu öndər Heydər Əliyevin milli ordu quruculuğunda bərqərar etdiyi ənənələr, bu gün ölkəmizin Prezidenti İlham Əliyev tərəfindən uğurla davam etdirilir. Həyata keçirilən islahatlar nəticəsində respublikada ordu quruculuğu sahəsində yüksək inkişafa nail olunmuşdur. Dövlət Sərhəd Xidmətinin Sahil Mühafizəsinin yaradılması isə ölkənin dəniz hüdudlarının qorunmasının keyfiyyətcə yeni mərhələyə qədəm qoymasına şərait yaratmışdır.
Gənclər və İdman Nazirliyi hərbi xidmətdə fərqləndiyinə görə Dövlət Sərhəd Xidmətinin bir qrup zabit və əsgərini fəxri fərman və hədiyyələrlə mükafatlandırmışdır.
Sonra nazir sərhəd-gözətçi gəmisini gəzmiş, yaşayış sahələrinə və xidməti otaqlara baxış keçirmiş, dənizçilərin iş və məişət şəraiti ilə yaxından tanış olmuşdur.
Mərasim konsert proqramı ilə davam etmişdir.
Bölmənin digər xəbərləri
