GƏNCLƏRİN 3-CÜ RESPUBLİKA FORUMU MAYDA KEÇİRİLƏCƏK
Gənclərin üçüncü respublika forumunun keçirilməsi ilə əlaqədar Gənclər, İdman və Turizm Nazirliyinin hazırladığı tədbirlər planına uyğun olaraq, fevralın 18-dən etibarən ölkənin müxtəlif bölgələrində nazirliyin nümayəndələrinin iştirakı ilə gənclərlə görüşlər olacaqdır. Tədbirlər 3 mərhələdə - rayon, zona və şəhər səviyyələrində keçiriləcəkdir. Mayın 3-də Respublika sarayında forumun ümumi iclaslarına yekun vurulacaqdır.
Görüşlərdə, zona konfranslarında və ümumi iclaslarda əsas diqqət gənclərin fiziki və mənəvi inkişafı, ölkənin ictimai-siyasi həyatında fəal iştirakı məsələlərinə, sosial müdafiə problemlərinə veriləcəkdir.
Forum çərçivəsində uşaqların ikinci folklor musiqisi festivalı, caz və orqan musiqisi gecələri, gənc karikaturaçıların əsərlərindən ibarət sərgi, kompüter qrafikası sahəsində ən yaxşı iş və asfalt üzərində çəkilmiş şəkil müsabiqələri keçiriləcək, gənc rejissorların filmlərinə baxış olacaqdır. ”Lider TV” teleşirkəti ilə birgə “Forumdan foruma” devizi altında telemarafon keçiriləcəkdir.
Bölmənin digər xəbərləri
