Gənclərin dayanıqlı inkişafda rolu
Bakı, 15 fevral, AZƏRTAC
Azərbaycan tarixi, geostrateji mövqeyi və dinamik inkişafı ilə qlobal arenaya hər zaman mühüm töhfələr verməkdədir. Odur ki, ölkəmizin dayanıqlı inkişaf məqsədlərinin uğurlu icrasında daim ön sıralarda olması təsadüfi deyil. “Dayanıqlı İnkişaf Məqsədləri indeksi” üzrə göstəricilərə əsasən ölkəmiz 166 ölkə sırasında 54-cü, Cənubi Qafqaz regionunda isə ilk sıradadır. BMT-nin İqtisadi və Sosial Şurasının təşkilatçılığı ilə keçirilən Yüksək Səviyyəli Siyasi Forum (YSSF) üçün regionda ilk ölkə olaraq 2017-ci və 2019-cu illərdə 2 Könüllü Milli Hesabat təqdim edən Azərbaycan, artıq növbəti 3-cü hesabatını təqdim etməyə hazırlaşır.
Bunu AZƏRTAC-a açıqlamasında Milli Məclisin deputatı Məzahir Əfəndiyev bildirib.
Deputat qeyd edib ki, bu gün heç kəsin kənarda qalmaması prinsipi ilə 17 məqsəd və 169 hədəfdən ibarət mürəkkəb gündəliyin həyata keçirilməsi üçün cəmiyyətin bütün təbəqələrinin iştirakı, sektorlararası əməkdaşlıq, innovativ yanaşmaya əsaslanan dayanıqlı həll yollarının tətbiqi və sosial qruplar arasında dialoqun təmini labüddür. Dayanıqlılığın təşviqi üçün isə gələcək nəsillərin maraqlarının müdafiəsi, habelə gənclərin qlobal dəyişikliklərə öz töhfəsini verə biləcəyi platformaların mövcudluğu mühümdür.
“2030 Gündəliyi dünyada növbəti 10 il ərzində yoxsulluğun azaldılması, rifahın təşviq olunması, inklüziv və ədalətli təhsilin təminatı, iqtisadiyyatın daha dayanıqlı sütunlar üzərində qurulması, bərabərsizliyə və iqlim dəyişikliyinə qarşı mübarizə və ekosistemlərin qorunmasına aparan iddialı səyləri özündə əks etdirməklə gənclərin bu proseslərdə iştirakını israrla tövsiyə edir. Ölkəmizdə gənclər siyasəti dövlət siyasətinin mühüm tərkib hissəsini təşkil edir və gənclərin cəmiyyətin aparıcı qüvvəsinə çevrilməsi üçün kifayət qədər geniş platformalar mövcuddur. Son 17 ildə Azərbaycanda gənclər sahəsinə ayrılan vəsait 100 dəfə artırılıb, gənclərin beynəlxalq səviyyələrdə inteqrasiyasının və iştirakçılığının gücləndirilməsini təmin edən yeni fəaliyyət istiqamətləri formalaşdırılmışdır. Azərbaycanda gənclərin inkişafı ilə əlaqədar reallaşdırılan proseslərə töhfə vermək məqsədilə həyata keçirilən layihələr Azərbaycan Respublikasının Birinci vitse-prezidenti, Heydər Əliyev Fondunun prezidenti və UNESCO-nun xoşməramlı səfiri Mehriban Əliyevanın dəstəyi ilə yeni nəfəs qazanıb. Azərbaycan Respublikasının Gənclər və İdman Nazirliyi və Birləşmiş Millətlər Təşkilatı İnkişaf Proqramının Azərbaycan Nümayəndəliyinin birgə həyata keçirdiyi “Qlobal siyasi müzakirələrdə gənclərin fəal iştirakının dəstəklənməsi üçün yeni platformalar yaradılması” layihəsi çərçivəsində Dayanıqlı İnkişaf Məqsədləri üzrə Gənc Səfirlərin seçilməsi təşəbbüsü irəli sürülüb, 2018-ci ildə Azərbaycanda və Cənubi Qafqazda ilk dəfə olaraq DİM üzrə 17 Gənc Səfir seçilmişdir. 2018-2020-ci illər ərzində 17 Gənc Səfir könüllü əsaslarla Dayanıqlı İnkişaf Məqsədlərinin Azərbaycanda təbliğinə, DİM-lərə nail olmaq üçün gənclərin iştirakının təşviqinə, yerli, milli və beynəlxalq səviyyələrdə atılan addımlar barədə cəmiyyətin məlumatlandırılması ilə yanaşı, ölkədə DİM-lərlə bağlı təşəbbüslərin həyata keçirilməsinə böyük töhfələr vermişlər. Məhz onların fəaliyyətlərinin nəticəsi olaraq Azərbaycanda yüzlərlə gənc DİM-lərdən xəbərdar olub və qlobal məqsədlər üçün fəaliyyətə başlayıblar.
Təşəbbüsün uğurlu və effektiv nəticələrini nəzərə alaraq, 2021-2023-cü illəri əhatə edəcək növbəti DİM üzrə Gənc Səfirlərin seçim mərhələsinə başlanılıb. Gənc Səfirlərin fəaliyyətinin əsas məqsədi Dayanıqlı İnkişaf Məqsədlərini Azərbaycanda təbliğ etmək, DİM-lərə nail olmaqda gənclərin iştirakını təşviq etmək, yerli və milli səviyyələrdə atılan addımlar barədə əhalinin məlumatlandırılmasına və Milli Hesabatların hazırlanmasına öz töhfələrini verməkdir. Ölkə gənclərinin “DİM üzrə Gənc Səfirlər”in seçim mərhələsi, şərtlər toplusu və layihə haqqında ətraflı məlumat əldə etmələri, habelə oxucular üçün də böyük maraq kəsb etməsi baxımından hazırlanmış olan info-saytı məmnuniyyətlə təqdim edirəm.
Əminəm ki, ulu öndər Heydər Əliyevin dövlət gənclər siyasətinin həyata keçirilməsində hər zaman vurğuladığı Azərbaycançılıq ideyası bu sahədə də əsas hədəf və fəaliyyət olacaqdır”, - deyə Məzahir Əfəndiyev vurğulayıb.
Bölmənin digər xəbərləri
