GƏNCLƏRİN İŞLƏ TƏMİN OLUNMASI ÜÇÜN “KARYERA GÜNLƏRİ” KEÇİRİLƏCƏKDİR
Bununla bağlı, mayın 31-də kütləvi informasiya vasitələri üçün mətbuat konfransı keçirilmişdir. Konfransda iştirak edən AİESEC təşkilatının Azərbaycandakı nümayəndəsi Bəxtiyar Hacıyevin sözlərinə görə, ötən ildən bu təşkilata üzv seçilən ölkəmizə təcrübə keçmək və fəaliyyət göstərmək üçün artıq xarici ölkələrdən də müraciətlər daxil olmuşdur.
Azərbaycandan isə artıq 4 nəfər gəncə Avropa ölkələrinin müxtəlif şirkətlərində təcrübə mübadiləsi keçmək üçün şərait yaradılmışdır.
Təşkilat ölkəmizdə səviyyəli gənc kadrların aşkarlanıb əmək bazarına cəlb olunması üçün “karyera günləri” təşkil etmək qərarına gəlmişdir. Bakı İdman Sarayında keçiriləcək bu tədbirdə hər bir gənc bilik və bacarığını müxtəlif sahələrdən olan 10-dək yerli və xarici şirkətə təqdim edə biləcəkdir.
