GİMNAST QIZLARIMIZ ASTANADAN SONRA İRKUTSK VƏ VARNADA ÇIXIŞ EDƏCƏKLƏR
Astanada bədii gimnastika üzrə Dünya Kuboku yarışlarının səkkizinci mərhələsi başa çatmışdır. Bu yarışlarda Azərbaycanı qarşıdakı Pekin Olimpiya Oyunlarının ehtiyat iştirakçısı Anna Qurbanova və Zeynəb Cavadlı təmsil edirdi.
Azərbaycan Gimnastika Federasiyasının mətbuat xidmətindən AZƏRTAC-ın müxbirinə bildirmişlər ki, çoxnövçülərin yarışında Qurbanova 26 iştirakçı arasında 11-ci nəticə göstərmişdir. Müsabiqədənkənar proqram üzrə çıxış edən Cavadlı isə üçüncü yeri tutmuşdur.
Dünya Kuboku Avropa-2008 yarışlarının mütləq çempionu rusiyalı Yevgeniya Kanayevaya qismət olmuşdur.
Yarışların növbəti mərhələsi iyulun 25-26-da Rusiyanın İrkutsk şəhərində keçiriləcəkdir. Olimpiya oyunları ərəfəsində sonuncu olacaq bu turnirdə ölkəmizi Olimpiadanın iştirakçıları Aliyə Qarayeva və Dinara Gimatova təmsil edəcəkdir.
Azərbaycanın Olimpiya yığmasının digər üzvləri - Vəfa Hüseynova, Anna Bitiyeva, Valeriya Yeqay, Alina Tryopina, Anastasiya Prasolova və Dina Qorina isə Sofiyada məşq toplantısını başa çatdırırlar. İyulun 24-25-də onlar Varnada qrup komandaları arasında keçiriləcək Dünya Kuboku yarışlarında iştirak edəcəklər.
Bölmənin digər xəbərləri
