“Globo”: Braziliyanın vitse-prezidenti müvəqqəti olaraq dövlət başçısı vəzifəsini icra edəcək
Bakı, 10 dekabr, AZƏRTAC
Braziliyanın vitse-prezidenti Jeraldu Alkmin müvəqqəti olaraq dövlət başçısı vəzifəsinin icrasına başlayacaq.
AZƏRTAC xəbər verir ki, “Globo” qəzetinin məlumatına görə, vitse-prezident bu gün Braziliyada Slovakiyanın Baş naziri Robert Fitso ilə görüşdə Lula da Silvanı təmsil edəcək.
Lula da Silva çərşənbə axşamı səhər saatlarında beyin qansızması diaqnozu ilə xəstəxanaya yerləşdirilib. Həkimlərin sözlərinə görə, cərrahi əməliyyat uğurla keçib və o, həftəsonunadək evə buraxılacaq.
79 yaşlı siyasətçi oktyabrın 19-da yaşadığı evdə yıxılaraq xəsarət almışdı. Xəstəxanaya yerləşdirilən dövlət başçısı oktyabrın 22-24-də BRICS sammitinin keçirildiyi Kazan şəhərinə getməmiş və tədbirə videokonfrans vasitəsilə qatılmışdı.
Luiz İnasiu Lula da Silva 1945-ci ildə Braziliyanın şimal-şərqindəki Pernambuku ştatında anadan olub. O, 2003-2011-ci illərdə ardıcıl iki müddətə prezident seçilib, habelə 2022-ci ildə keçirilmiş seçkilərdə qalib gələrək üçüncü dəfə bu posta qayıdıb.
Bölmənin digər xəbərləri
