ELM VƏ TƏHSİL
Gömrük Akademiyası da qanvermə aksiyasına qoşulub
![](/files/galleryphoto/2020/1/1200x630/15872069125349511761_1200x630.jpg)
![](/files/galleryphoto/2020/1/1200x630/15872069124361636764_1200x630.jpg)
![](/files/galleryphoto/2020/1/1200x630/1587206912146875705_1200x630.jpg)
![](/files/galleryphoto/2020/1/1200x630/15872069123424332768_1200x630.jpg)
Bakı, 18 aprel, AZƏRTAC
Koronavirus (COVID-19) pandemiyası ilə əlaqədar ölkədə xüsusi karantin rejiminin tətbiq olunduğu müddətdə talassemiya və hemofiliya, eləcə də leykoz xəstəliyindən əziyyət çəkən uşaqlar üçün qan ehtiyatı azaldığından Birinci vitse-prezidenti Mehriban Əliyevanın təşəbbüsü ilə Heydər Əliyev Fondunun başlatdığı qanvermə aksiyasına Dövlət Gömrük Komitəsinin Akademiyası da qoşulub.
Akademiyadan AZƏRTAC-a bildirilib ki, qanvermə aksiyasında Gömrük Akademiyasının rəhbərliyi və əməkdaşları iştirak ediblər. Aksiyada Bahadur Eyvazov adına Elmi-Tədqiqat Hematologiya və Transfuziologiya İnstitutunun Mərkəzi Qan Bankının səyyar tibb briqadasının həkim-hemotoloqları donorların sağlamlıq vəziyyətini yoxladıqdan sonra müvafiq qaydada qan götürüblər. Qan nümunələri xüsusi laboratoriyada yoxlamadan keçiriləcək və istifadə edilməsi üçün Mərkəzi Qan Bankında toplanacaq.
Bu, akademiya əməkdaşlarının son altı ay ərzində iştirak etdiyi ikinci qanvermə aksiyasıdır.