GÖYÇAYDA OLİMPİYA-İDMAN KOMPLEKSİNİN İNŞASINA BAŞLANMIŞDIR
AZƏRTAC xəbər verir ki, Gənclər və İdman Nazirliyinin sifarişi ilə Göyçay şəhərinin girişində, Bakı-Qazax yolunun kənarında Olimpiya-İdman Kompleksinin tikintisinə başlanılmışdır.
İnşaat işlərini “RK Təmir-Tikinti” Şirkəti həyata keçirir. Podratçı şirkətin iş icraçısı Rüstəm Talışınskinin sözlərinə görə, kompleksin əsas korpusunun bünövrə hissəsi qazılmış, hazırda isə taxta və dəmir qəlib işləri görülür. Obyektdə 40 işçi çalışır. Baş plana əsasən 6,5 hektar sahəsi olan bu olimpiya şəhərciyində əsas korpusla yanaşı üzgüçülük hovuzu, futbol, voleybol, basketbol və uzunluğa tullanma meydançaları, tennis kortu, soyunub-geyinmə otaqları, duşxanalar, 5 kotteç, iki mərtəbəli 80 yerlik mehmanxana, yeməkxana, su nasos stansiyası, su ambarı, qazanxana, transformator və avtomobil dayanacağı da olacaqdır. Bütün bunlar müasir standartlara uyğun mühəndis texniki qurğularla təchiz olunacaqdır.
Plana uyğun olaraq olimpiya şəhərciyində tikinti sahəsi 8578 kvadratmetr, yaşıllıq sahəsi 30916 kvadratmetr, yol və meydançalar 25506 kvadratmetr ərazini əhatə edəcəkdir. Havaların isti keçməsinə baxmayaraq tikinti meydançasında işlər dayandırılmır. İnşaat işləri genişləndikcə burada eyni vaxtda 100-dən artıq işçinin çalışacağı gözlənilir. İlin sonunadək əsas korpusun tikintisinin başa çatdırılması və kompleksin 2008-ci ildə ölkəmizdə keçiriləcək prezident seçkilərinədək istifadəyə verilməsi nəzərdə tutulur.
Xatırladaq ki, regionda ən böyük idman qurğusu olacaq Göyçay Olimpiya-İdman Kompleksində Avropa və dünya çempionatlarının, beynəlxalq yarışların keçirilməsi üçün hər cür şərait yaradılacaqdır.
Bölmənin digər xəbərləri
