Güclü “Amphan” siklonu Hindistan və Banqladeş sahillərinə yaxınlaşır
Bakı, 19 may, AZƏRTAC
“Amphan” siklonu yaxın sutka ərzində fövqəladə güclü qasırğaya çevriləcək və meteoroloqların hesablamalarına görə, mayın 20-də Hindistanın Qərbi Benqaliya ştatı sahillərinə yaxınlaşacaq.
AZƏRTAC xəbər verir ki, Hindistanın Meteorologiya Departamentinin saytında yerləşdirilən məlumata əsasən, siklonda küləyin sürəti saatda 155 kilometrə çatacaq. Meteoroloqlar siklonun hərəkətini daim nəzarətdə saxladıqlarını bildirirlər. Hindistanın Qərbi Benqaliya və Odişa ştatlarında yaşayan balıqçılara mayın 21-i də daxil olmaqla dənizə çıxmamaq tövsiyə edilir.
Bir qədər əvvəl Hindistan və Banqladeşin hakimiyyət orqanları siklonun yaxınlaşması səbəbindən ümumilikdə sahilyanı ərazilərdən 2 milyona yaxın insanın təxliyə ediləcəyini bildiriblər. İndiyə qədər artıq minlərlə insan hər iki ölkənin şərq sahillərini tərk edib.
Bölmənin digər xəbərləri
