Gürcüstanda narkotik cinayətlərində iştirak edənlərə qarşı xüsusi əməliyyat keçirilib
Tbilisi, 22 yanvar, AZƏRTAC
Gürcüstanın Daxili İşlər Nazirliyi son 24 saat ərzində paytaxt Tbilisidə və regionlarda xüsusi əməliyyat keçirib.
AZƏRTAC xəbər verir ki, bu barədə ölkənin daxili işlər nazirinin müavini Aleksandre Daraxvelidze məlumat verib.
Bildirilib ki, əməliyyatlar nəticəsində narkotik cinayətlərində iştirak edən 88 nəfər həbs olunub.
Onlardan külli miqdarda müxtəlif növ narkotik və psixotrop maddələr, odlu silahlar, eləcə də qanunsuz narkotik satışı nəticəsində əldə edildiyi iddia olunan pullar müsadirə edilib.
Saxlanılanlar arasında Gürcüstan və xarici ölkə vətəndaşları var.
Axtarışlar nəticəsində külli miqdarda müxtəlif növ narkotik maddələr, o cümlədən kokain, heroin, alfa PVP, buprenorfin, metadon, morfin, MDMA və qurudulmuş marixuana sübut kimi müsadirə olunub.
Saxlanılan şəxsləri 20 ilə qədər və ya ömürlük həbs cəzası gözləyir.
Məlumata görə, narkotik cinayətkarlığına qarşı mübarizə nəticəsində 2025-ci ilin son 7 ayında Gürcüstanda 5000-dən çox şəxs həbs olunub və cinayət məsuliyyətinə cəlb edilib,
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
