Hacıqabulda bu günədək 781 ton meyvə tədarük olunub
Hacıqabul, 18 iyul, Mahir Babayev, AZƏRTAC
Hacıqabulda təsərrüfatın digər sahələri ilə yanaşı, bağçılığın inkişafına da xüsusi diqqət yetirilir. Dövlətin aqrar sektorun inkişafı ilə bağlı məhsul istehsalçılarına göstərdiyi hərtərəfli dəstəkdən yararlanan bağbanlar cari ildə bağlardan bol məhsul götürmək üçün ağaclara nümunəvi qulluq göstəriblər. Bunun nəticəsində də bağlarda meyvə bol olub.
Rayon Statistika İdarəsindən AZƏRTAC-ın bölgə müxbirinə bildiriblər ki, xeyli vaxtdır ki, hacıqabullu bağbanlar meyvə bağlarında yetişmiş məhsulun yığımını aparırlar. Bağbanlar indiyədək rayonda mövcud olan 1559.3 hektar meyvə bağlarından 781 ton meyvə yığıblar ki, bu da ötən ilin eyni dövrü ilə müqayisədə xeyli çoxdur. Tədarük olunan meyvənin 8 tonunu alma, 21 tonunu armud, 39.1 tonunu albalı, 3.3 tonunu gavalı, 160 tonunu alça,79.8 tonunu gilas, 437 tonunu ərik, 14.5 tonunu şaftalı və 18.3 tonunu isə sair meyvələr təşkil edib.
Rayonda meyvə yığımı davam edir.
Bölmənin digər xəbərləri
