Havaya tullantı atan ictimai-iaşə obyektlərinin sahibləri cəzalandırılıblar
Bakı, 17 noyabr, AZƏRTAC
Dövlət Ekoloji Təhlükəsizlik Xidmətinin əməkdaşları atmosfer havasına atılan tullantıların azaldılması və mövcud normalara cavab verilməsi məqsədilə Bakı şəhərində fəaliyyət göstərən şadlıq saraylarında nəzarət tədbirlərini davam etdirirlər.
Xidmət rəisi Hikmət Əlizadə AZƏRTAC-a bildirib ki, keçirilən nəzarət tədbirləri zamanı paytaxtın Xətai rayonunda fəaliyyət göstərən “Neapol”, “Kleopatra”, “Leyla Palace”, “Mirvari”, “Elgün”, “Olivium” və “Qəsr” şadlıq saraylarında təmizləyici qurğuların olmasına baxmayaraq, onlara texniki xidmət göstərilməməsi və filtrlərin vaxtaşırı təmizlənməməsi səbəbindən havaya normadan artıq tullantı atıldığı, “By Shirulla” restoranında isə ümumiyyətlə təmizləyici qurğunun quraşdırılmadığı müəyyən edilib.
“Faktlarla bağlı akt, protokol tərtib edilib və obyekt sahibləri inzibati məsuliyyətə cəlb olunub”.
Xidmət rəisi onu da qeyd edib ki, əməkdaşlarımız tərəfindən monitorinqlər Bakıda, eyni zamanda regionlarda da davam etdirilir.
Bölmənin digər xəbərləri
