Hemilton: İndi biz əvvəlkindən daha çox təzyiq hiss edirik
Bakı, 6 iyun, AZƏRTAC
Kanadada beş dəfə podiuma çıxan, dörd dəfə qalib gələn Luis Hemilton qarşıdakı uik-enddə də qələbə qazanacağına ümid edir. Niko Rosberqin Monrealdakı uğurları elə də çox deyil, lakin sonuncu yürüşdəki uğursuzluqdan sonra onun qətiyyəti heç də azalmayıb.
Luis Hemilton deyib: “Formula-1” yarışlarında 44-cü dəfə qalib gəlməyimə hələ də inana bilmirəm. Karyeramda mənə kömək edənlər çox olub, onların hamısını sadalaya bilmərəm. Bu nailiyyət mənim üçün və ailəm üçün xüsusi əhəmiyyət kəsb edir. Mən öz mexaniklərimə təşəkkür edirəm, axı, mövsümün mürəkkəb başlanğıcından sonra onlar öz işlərini davam etdirir, məni dəstəkləyirlər. Yenidən qələbə qazanmağın ayrı ləzzəti var, ümidvaram ki, bu uğurumuz onların da inamını artıracaq.
Qarşıda bizi uzun yol gözləyir. İlk altı yürüşdə biz anladıq ki, bu il hər şey ola bilər. Vəziyyət yaxşılığa doğru da dəyişə bilər, pisliyə doğru da. Bizim güclü komandamız var, lakin indi biz həmişəkindən daha çox təzyiq hiss edirik, ona görə də əlbir olmalı və bütün sahələrdə irəli getməliyik.
Mən sürəti itirmədiyimi artıq sübut etmişəm və qalan yürüşlərdə də belə olacaq. Buna görə növbəti mərhələni səbirsizliklə gözləyirəm. Monrealda həmişə bəxtim gətirib, fantastik ab-havalı şəhər trasında ilk yürüşdə olduğu kimi yenə uğur qazanacağıma ümid edirəm”.
Niko Rosberq: “Mövsümə çox yaxşı başladım. Yürüşlərin mürəkkəb olacağını gözləyirdim və hazırlaşırdım. Bu məsələdə təcrübə çox köməyimə gəldi. Ümidvaram ki, bütün uğursuzluqlar əvvəlki Qran-Pridə qalacaq, indi irəli getmək olar.
Sponsorlarla görüşmək üçün Bostona, sonra isə Kanadaya səfərimi səbirsizliklə gözləyirəm. Oranın çox gözəl trası var, bizim maşınımız rəqabət qabiliyyətli olmalıdır. “Red Bull Racing” yürüşçülərinin bu dəfə necə mövqe tutacağı maraqlıdır. Ümid edirəm ki, biz yenə onları qabaqlayacağıq”.
“Mercedes Motorsport” komandasının rəhbəri Toto Volff: “Monako Qran-prisindən sonra ziddiyyətli emosiyalar qalıb. Luisin işləri lazımınca getdi. Nikoya gəldikdə isə bir yürüşdə çoxsaylı uğursuzluqlar üzündən həmin gün onun üçün çox çətin oldu. Bizim gəldiyimiz ümumi nəticə belədir ki, “Red Bull Racing” ciddi təhlükədir. Monakoda qalib gəlmək üçün biz çox cəsarətli strategiya seçməli olduq. Luisin gərgin səyləri və hətta uğursuzluğu pit-stopda Danielin zədələnməsi oldu.
Dəfələrlə demişəm ki, “Formula-1” yarışlarında dincəlməyə imkanımız olmur. Üstünlüyü əldə saxlamaq üçün artan təzyiq şəraitində daim irəliləmək lazımdır. Mövsümün bu qədər gözlənilməz olması idmanın xeyrinədir. Bu onu göstərir ki, “Formula-1” əla formadadır, lakin komandamız hələ çox iş görməlidir. Özümüzə daha çox güvənməyə imkanımız var, lakin səmərəni artırmağa çalışmaq daha vacibdir.
Monte-Karloda “Mercedes” 50-ci qələbəsini qazanıb. Bu, möhtəşəm nailiyyətdir, lakin uzunmüddətli perspektivdə uğur qazanmaq istəyiriksə, “Mercedes”in bu idman növünün əfsanələri ilə ayaqlaşmasını istəyiriksə biz əvvəlkindən daha çox səy göstərməliyik”.
Komandanın texniki direktoru Paddi Lou: “Monakoda dalbadal dördüncü dəfə qələbə qazanmağımıza sevinirik, lakin bu yürüşün Niko üçün mürəkkəb olması bizi o qədər də razı salmır. Biz nə baş verdiyini aydınlaşdırmaq üçün çox çalışdıq və müəyyən mülahizələrimiz növbəti yürüşlərdə bizə kömək edəcək.
Monreal trası qeyri-adiliyi, çoxsaylı döngələri ilə fərqlənir. Düz xətt boyunca uzun hissələr həm güc qurğusu, həm də əyləclər üçün böyük gərginlik deməkdir. Bundan əlavə, belə trasda rezinlə işləmək asan deyil. Bu uik-enddə “UltraSoft”u ikinci dəfə görəcəyik. Seçmə dövrədə sərf edilən vaxt 2015-ci ildəki ilə müqayisədə xeyli yaxşı olmalıdır, lakin bu trasda rezinə düşən gərginlik Monakodakından çoxdur, buna görə də əsas vəzifələrdən biri yürüşdə “UltraSoft”dan daha yaxşı istifadə etmək üsulunu anlamaqdır”.
Bölmənin digər xəbərləri
