“Mən şadam ki, Amerika Birləşmiş Ştatlarından respublikamıza belə geniş tərkibdə nümayəndə heyəti gəlmışdir. Biz həmişə belə bir xətt götürürük ki, ABŞ ilə Azərbaycan arasında əlaqələr hərtərəfli inkişaf etsin. Nümayəndə heyətinizlə görüşmək imkanını bu mənada mühüm hadisə sayırıq”.

Azərbaycan Prezidenti Heydər Əliyev bu sözləri mayın 15-də ABŞ Dövlət katibinin xüsusi müşaviri, ABŞ-ın yeni müstəqil dövlətlər üzrə siyasətinin baş əlaqələndiricisi Ceyms Kollinzin başçılıq etdiyi nümayəndə heyətini qəbul edərkən söyləmişdir. Nümayəndə heyətinin tərkibinə ABŞ dövlət departamentinin regional münaqişələr idarəsinin rəisi, ATƏM-in Minsk qrupunda ABŞ-ın nümayəndəsi Cozef Pressel, ölkənin müdafiə, maliyyə, energetika nazirliklərinin nümayəndələri daxildirlər. Səfərdən məqsəd iki ölkə arasında qarşılıqlı münasibətlərin daha da inkişaf etdirilməsi imkanlarını öyrənmək, əməkdaşlığın perspektivlərini müzakirə etməkdir.

Qonaqları mehribanlıqla salamlayan Azərbaycan dövlətinin başçısı dedi:

- Nümayəndə heyətinin tərkibindən məlum olur ki, ölkələrimiz arasında gələcək münasibətlərin bir çox cəhətlərini müzakirə etməyə imkanımız olacaq və mən bunları müzakirə etməyə hazıram. Konkret məsələlərə keçməzdən əvvəl bir daha Amerika Birləşmiş Ştatlarına, onun rəhbərliyinin, ABŞ Prezidentinin fəaliyyətinə hörmət bəslədiyimi, gələcək əlaqələrin münasibətlərimizin inkişafına kömək edəcəyinə əmin olduğumu bildirmək istəyirəm.

Heydər Əliyev daha sonra bildirdi: İlk növbədə qeyd etmək istərdim ki, biz Sovet İttifaqının dağılmasından sonra yaranmış dövlətlərin və əlbəttə ki, ən əvvəl, Azərbaycan Respublikasının suverenliyini və müstəqilliyini dəstəkləmək sahəsində Birləşmiş Ştatların göstərdiyi səyləri yüksək qiymətləndiririk. Həmin respublikaları, o cümlədən Azərbaycanı müstəqillik və suverenlikdən məhrum etmək cəhdləri olduğunu nəzərə alsaq, ABŞ-ın bu respublikaları dəstəkləməsi mühüm amil olmuşdur və bu gün də belə amil olaraq qalır, gələcəkdə də qalacaqdır.

Ermənistan ilə Azərbaycan arasındakı hərbi münaqişəni, əslində müharibəni Azərbaycanın suverenliyi, müstəqilliyi və ərazi bütövlüyü baxımından çox ciddi problem kimi qiymətləndirən Heydər Əliyev dedi: Bizim qəti mövqeyimiz belədir ki, bu münaqişə sülh yolu ilə aradan qaldırılmalı, Ermənistan ilə Azərbaycan arasındakı münasibətlər, həmçinin Dağlıq Qarabağ haqqında məsələ yalnız danışıqlar vasitəsilə həll olunmalıdır. Bununla əlaqədar ATƏM-lə, onun Minsk qrupu ilə fəal əməkdaşlıq edirik. ATƏM-in, onun Minsk qrupunun fəaliyyətinə, həmçinin bu qurumların üzvü kimi Birləşmiş Ştatların səylərinə çox böyük ümid bəsləyirik.

Prezident qeyd etdi ki, müstəqillik üçün iqtisadiyyatın inkişafının, başqa ölkələrlə, o cümlədən ABŞ ilə iqtisadi əməkdaşlığın böyük əhəmiyyəti var. Azərbaycanın iqtisadi potensialı böyükdür. Bu, respublikanın rifahı naminə istifadə edilməklə yanaşı, Birləşmiş Ştatlar üçün də cəlbedici ola bilər. Bu baxımdan Azərbaycanın neft yataqlarından istifadə edilməsinin böyük əhəmiyyəti var. Biz bu fikirdəyik ki, həmin yataqlardan birgə istifadə barədə Azərbaycan Dövlət Neft Şirkəti ilə Qərbin neft şirkətləri, o cümlədən ABŞ-ın “AMOKO”, “Penzoyl” şirkətləri ilə aparılan danışıqlar uğurlu olacaqdır. Heydər Əliyev dedi: Bildiyiniz kimi, danışıqların növbəti mərhələsi hazırda İstanbulda davam edir və ümidvaram ki, bunlar müvəffəqiyyətlə başa çatacaq və neft müqaviləsini qəti şəkildə imzalamaq mümkün olacaqdır. Prezident ümid etdiyini bildirdi ki, neft sahəsində əməkdaşlıq ölkələrimiz arasında başqa sahələrdə də əlaqələri genişləndirməyə imkan verəcəkdir. O dedi ki, iqtisadi əməkdaşlığın inkişafı üçün ölkələrimiz arasında əlaqələrin daha sıx olması vacibdir.

Görüşdə iki ölkə arasında münasibətlərin daha da möhkəmləndirilməsi ilə əlaqədar digər mühüm məsələlər barədə də geniş fikir mübadiləsi aparıldı.

Qəbulda respublika Ali Sovetinin sədri Rəsul Quliyev, Baş nazirin birinci müavini Fuad Quliyev, dövlət müşaviri Vəfa Quluzadə, xarici işlər naziri Həsən Həsənov, ABŞ-ın Azərbaycandakı səfiri Riçard Deyl Kozlariç və digər rəsmi şəxslər iştirak etmişlər.

Aslan Aslanov

AZƏRTAC-ın müxbiri