RƏSMİ XRONİKA
HEYDƏR ƏLİYEV: İRANLA ƏLAQƏLƏRİMİZİN GENİŞ PERSPEKTİVLƏRİ VARDIR
Azərbaycan dövlətinin rəhbəri İslam aləmində dərin hüzn və ehtiramla qeyd olunan müqqədəs Məhərrəm ayının Aşura günü və bir neçə gün əvvəl İranın Məşhəd şəhərində müqəddəs ziyarətgahda düşmən tərəfindən törədilmiş faciəli hadisə ilə bağlı qonağa başsağlığı verdi və Azərbaycan xalqının bu kədərə şərik olduğunu dost ölkənin xalqına və rəhbərliyinə bir daha yetirməyi ondan xahiş etdi. H.Əliyev sözünə davam edərək dedi: İslam dininə etiqad edən bütün xalqlar kimi, biz azərbaycanlılar üçün də müqəddəs olan məhərrəmlik dövründə hamımız üçün əziz bir yerdə - Məşhəddə törədilmiş düşmən əməli hər bir vicdanlı adam kimi məni də sarsıtdı. Dini, mənəvi və mədəni abidəmizə təcavüz olunması humanizmə sığmayan dəhşətli bir haldır. Belə hadisənin baş verməsi bütün Azərbaycan xalqının qəlbini ağrıdır. Biz əminik ki, İran hökuməti həmin hadisənin günahkarlarının cəzalandırılması və müqəddəs ziyarətgahların qorunması sahəsində öz fəaliyyətini gücləndirəcəkdir.
Heydər Əliyev ölkələrimiz arasında əməkdaşlıq məsələlərindən danışaraq qeyd etdi ki, bu əlaqələr xoş məram üzərində qurulmuş və onun geniş perspektivləri vardır. Azərbaycan tərəfi İranla bağlanmış bütün müqavilə və sazişlərin, eləcə də ötən il Bakıda olmuş İran Prezidenti ağayi Haşimi Rəfsəncaninin əməkdaşlığın inkişafına yeni təkan vermiş səfəri zamanı imzalanmış sənədlərin yerinə yetirilməsinə böyük əhəmiyyət verir. Azərbaycan Prezidenti dedi ki, dost ölkənin rəhbərliyinin dəvəti ilə yaxın günlərdə İrana səfəri ərəfəsində iki ölkə arasında bağlanmış bütün sənədlərin icrasının vəziyyəti ilə tanış olur və onların işləməsinə nəzarət edir. Heydər Əliyev qeyd etdi ki, Azərbaycan xalqı onun İrana səfərinə böyük əhəmiyyət verir və bu səfərdən çox şey gözləyir.
Qonaq başsağlığına görə minnətdarlığını bildirdikdən sonra respublikamıza səfərinin nəticələri barəsində Azərbaycan Prezidentinə məlumat verdi. M.Sərmədi dedi ki, Azərbaycan və İran arasında əməkdaşlıq həm iki ölkənin mənafeyinə, həm də bütövlükdə bölgənin mənafeyinə xidmət edir. Onun Azərbaycana səfəri də ölkəsinin respublikamızla əlaqələri daha da inkişaf etdirmək niyyətindən irəli gəlir. Nazir müavini Bakıdakı görüşləri zamanı mətbuat və informasiya sahəsində əməkdaşlıq barəsində konkret nəticələr əldə olunduğunu söylədi.
M.Sərmədi qeyd etdi ki, İran xalqı və onun rəhbərliyi Azərbaycan Prezidenti Heydər Əliyevin Tehrana qarşıdakı səfərini səbirsizliklə gözləyir və bu səfərin xalqlarımızın daha da yaxınlaşmasına müsbət təsiri olacağına ümid edir.
Qəbulda respublikanın dövlət müşaviri Vəfa Quluzadə, xarici işlər naziri Həsən Həsənov, İranın Azərbaycandakı səfiri Əli Əsğar Nəhavəndian və qonşu ölkənin xarici siyasət idarəsinin məsul işçisi Ramin Mehmanpərəst iştirak edirdilər.
Aslan Aslanov
AZƏRTAC-ın müxbiri