İQTİSADİYYAT
“HƏZİ ASLANOV” STANSİYASIBU İL İSTİFADƏYƏ VERİLƏCƏK
Azərbaycan hökuməti Bakı metropoliteni üçün vaqonlar alınmasına 40 milyard manat ayırmışdır. Bunu Yeni Azərbaycan Partiyasının binasında keçirilmiş mətbuat konfransında Bakı metropoliteninin rəisi Tağı Əhmədov demişdir. O bildirmişdir ki, metropoliten bu vəsaitə Mıtişşi vaqonqayırma zavodundan 25 vaqon alacaqdır. 2002-2003-cü illərdə həmin müəssisədən 50 vaqon almaq nəzərdə tutulmuşdur ki, bu da Bakı metropoliteninin bütün vaqon parkının üçdə birini dəyişməyə imkan verəcəkdir. Yeni vaqonların alınması qatarların hərəkət intervalını azaltmağa imkan verəcəkdir. Hazırda bu interval ayrı-ayrı xətlərdə 4-8 dəqiqə təşkil edir.
İlin sonunadək “Həzi Aslanov” stansiyası istifadəyə veriləcəkdir. Bu stansiyada tikinti işləri Avropa Bankının qrantı hesabına başa çatdırılacaqdır. Tağı Əhmədov yeni xətlərin tikintisi barədə məlumat verərək demişdir ki, perspektiv planda “Xətai” və “Həzi Aslanov” stansiyalarını birləşdirmək, xətləri “Əzizbəyov” stansiyasından Binə hava limanına qədər və “Əcəmi” stansiyasından 7-ci mikrorayonadək uzatmaq nəzərdə tutulmuşdur.
Mətbuat konfransında bildirilmişdir ki, nəqliyyatda güzəştlər ləğv olunduqdan sonra hər gün Bakı metrosundan orta hesabla 350 min nəfər istifadə edir. ABŞ-dakı 11 sentyabr hadisələrindən sonra metropolitenin təhlükəsizlik xidmətləri üçün Amerika avadanlığı alınmışdır.