SİYASƏT
Hikmət Babaoğlu: Prezident İlham Əliyev XXI əsr milli inkişaf strategiyamızın memarıdır
Bakı, 12 aprel, AZƏRTAC
Prezident İlham Əliyev XXI əsr milli inkişaf strategiyamızın yaradıcısı və memarıdır. Dövlətimizin başçısının 2003-cü ildə Azərbaycanda siyasi hakimiyyətə gəlməsi müstəqillik tariximizin ayrıca bir mərhələsini təşkil edir. Hər şeydən əvvəl, bu mərhələ müstəqilliyimizin möhkəmləndirilməsi, iqtisadi dayanıqlılığımızn artırılması, sosial dövlət öhdəliklərinin realizə edilməsi, ölkəmizdə hərbi sənayenin yaradılması və ordu quruculuğunun yenidən təşkilini özündə ehtiva edir. Prezident İlham Əliyev XXI əsr milli inkişaf strategiyamızın yaradıcısı və memarıdır. Bundan başqa, yeni regional və qlobal layihələrin həyata keçirilməsi, xarici siyasət kursunda hücum diplomatiyası strategiyasının müəyyənləşdirilməsi, Azərbaycanın beynəlxalq münasibətlər sistemində yerinin və rolunun daha da artırılması bu mərhələdə əsas diqqətçəkən məqamlardır.
Bu fikirləri AZƏRTAC-a açıqlamasında Milli Məclisin deputatı Hikmət Babaoğlu bildirib.
Onun sözlərinə görə, bu dövr, eyni zamanda, çoxsaylı sosial layihələrin həyata keçirilməsi, vətəndaşlarının rifahının yaxşılaşdırılması, iqtisadi inkişafın təmin edilməsi, inklüziv cəmiyyətin qurulması və bütün sahələrdə tərəqqinin əldə edilməsi dövrüdür.
H.Babaoğlu vurğulayıb ki, 2003-cü ildən 2018-ci ilədək xarakterik olan bu inkişaf ənənələri 2018-ci ildə İlham Əliyevin yenidən prezident seçilməsi ilə növbəti, daha intensiv inkişaf mərhələsinə qədəm qoydu. Bu mərhələ dərin islahatlar, regional layihələrin uğurla reallaşdırılaraq başa çatdırılması, 2011-ci ildən başlayaraq Azərbaycanın BMT Təhlükəsizlik Şurasının qeyri-daimi üzvü kimi bu beynəlxalq təşkilata iki il rəhbərlik etməsi təcrübəsinin 2019-2022-ci illərdə Qoşulmama Hərəkatına rəhbərlik edəcək mərhələsinə qədər beynəlxalq nüfuzunun artması hadisəsidir.
“2018-ci il prezident seçkilərindən sonra dövlətimizin başçısı İlham Əliyevin rəhbərliyi ilə xalqımızın əldə etdiyi ən böyük tarixi nailiyyət və uğur, heç şübhəsiz, 2020-ci ildə 44 günlük müharibədən sonra tarixi Zəfər qazanaraq ərazi bütövlüyümüzü bərpa etməsidir. Bu hadisə təkcə Prezident İlham Əliyevin hakimiyyəti dövrünün parlaq zəfəri deyil, bütövlükdə Azərbaycanın hərbi-siyasi tarixinin son 200 ildə əldə etdiyi ən böyük, ən parlaq qələbədir. Tarixi Qələbəmiz özlüyündə nə qədər çətin əldə edilən bir nailiyyət idisə, bu Zəfərimiz nəticəsində regionumuzda yaranan yeni güc balansının və strateji konfiqurasiyanın dünyaya qəbul etdirilməsi işi də bir o qədər çətin proses idi”, - deyə H.Babaoğlu qeyd edib.
Deputatın sözlərinə görə, bu yaxınlarda Avropa İttifaqının paytaxtı Brüsseldə keçirilən üçtərəfli görüşdən sonra əminliklə deyə bilərik ki, yeni reallıq artıq təkcə region ölkələri tərəfindən deyil, bütövlükdə Avropa tərəfindən də qəbul edildi. Artıq regionumuzun gələcəyi Azərbaycanın irəli sürdüyü beş baza prinsipi əsasında müəyyənləşəcək. Başqa sözlə, Prezident İlham Əliyevin siyasi strategiyası Cənubi Qafqaz kimi mürəkkəb tarixi-siyasi coğrafiyada mümkün sülhü diktə edəcək.
“Hazırda xalqımız tarixi Zəfərimizin yaratdığı yeni reallıqlar sayəsində uzun illərdir gözlədiyi Böyük Qayıdışın təntənəsini yaşamaqdadır. Bu isə növbəti tarixi inkişafımız, rifah və nailiyyətlərimizin başlanğıcıdır”, - deyə Hikmət Babaoğlu fikirlərini yekunlaşdırıb.