Hulusi Kılıç: Qara Yanvar hadisələri insanlığa qarşı cinayətdir
Ankara, 20 yanvar, AZƏRTAC
Bakıda və Azərbaycanın digər şəhərlərində baş vermiş Qara Yanvar hadisələri insanlığa qarşı cinayətdir. Həmin günlərdə Azərbaycan xalqı öz sarsılmaz ruhunu və azadlıq istəyini, milli hüquq və mənafeləri qorumaq əzmini bütün dünyaya nümayiş etdirdi.
Bu sözləri Türkiyənin Azərbaycandakı sabiq səfiri, “İMZA” Sosial İnkişafa Dəstək İctimai Birliyinin Türkiyədəki nümayəndəsi Hulusi Kılıç AZƏRTAC-a müsahibəsində deyib.
Onun sözlərinə görə, Qanlı Yanvar hadisələri iştirakçılarının qəhrəmanlığı ölkə tarixində yeni səhifə açıb və 1991-ci il oktyabrın 18-də “Azərbaycan Respublikasının Dövlət Müstəqilliyi haqqında” Konstitusiya Qanununun qəbulu ilə ölkənin müstəqilliyinin bərpasına gətirib çıxarıb.
O, vurğulayıb ki, Azərbaycanda 150 dinc sakinin qətlə yetirilməsi və 740-dan çox silahsız insanın yaralanmasına görə birbaşa məsuliyyəti Sovet İttifaqı rəhbərliyi, şəxsən Sov.İKP MK-nın baş katibi Mixail Qorbaçov və SSRİ müdafiə naziri Dmitri Yazov daşıyır.
H.Kılıç xatırladıb ki, Azərbaycanda törədilən qanlı cinayətləri gizlətmək üçün hakimiyyət televiziya və radioların yayımını dayandırıb.
“Qorbaçov və onun dəstəsinin bütün səylərinə baxmayaraq, beynəlxalq ictimaiyyət dinc əhaliyə qarşı amansız qətliam törədən sovet rəhbərliyinin qanlı əməllərindən xəbər tutdu. İnsan haqları təşkilatları sovet ordusunun hərəkətləri, nümayişçilərin atəşə tutulması, Azərbaycan şəhərlərinin küçələrində törədilən vəhşiliklər və qətllər barədə çoxsaylı reportajlar hazırlayıb. Müxtəlif qlobal məkanlarda bu dəhşətli faciədə əli olanların məsuliyyətə cəlb edilməsi üçün çağırış edilib", -deyə agentliyin həmsöhbəti bildirib.
Sabiq səfir qeyd edib ki, Azərbaycan üçün ağır günlərdə Türkiyə xalqı öz qardaşlarına rəğbət bəsləyib.
“Təəssüf ki, illər keçsə də, Qara Yanvar hadisələrinin günahkarları hələ də layiqincə cəzalandırılmayıb. Əminəm ki, həmin gün gələcək və ədalət zəfər çalacaq”, - deyən Kılıç şəhidlərin ailələrinə və yaxınlarına, bütün Azərbaycan xalqına dərin hüznlə başsağlığı verib.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
