İFAÇILIQ SƏNƏTİNİN SƏVİYYƏSİNİ YÜKSƏLTMƏK ÜÇÜN
Martın 1-dən etibarən Bakının konsert salonlarında, mədəniyyət mərkəzləri və evlərində fonoqramdan istifadə olunması qadağan ediləcəkdir.
Bakı Şəhər Mədəniyyət İdarəsinin rəisi Həsənağa Qurbanovun bununla əlaqədar verdiyi əmrdə deyilir ki, konsertlərdə mahnıların canlı yox, səsli fonoqramlardan istifadə edilməklə ifa olunması tamaşaçılara hörmətsizliklə yanaşı, xalqımızın milli və mənəvi irsinin tədricən dağılmasına gətirib çıxarır.
Əmrdə bildirilir ki, paytaxtın mədəniyyət departamentinin əsas tutduğu başlıca meyar Azərbaycan Prezidenti Heydər Əliyevin milli mənəvi dəyərlərin qorunub saxlanması haqqında xalqa müraciətidir. Ona görə də həmin əmrə əsasən milli mədəniyyətimizə zidd olan musiqi və mahnıların yayılmasının qarşısını almaq məqsədi ilə komissiya yaradılır. Tanınmış mədəniyyət və incəsənət xadimlərinin də daxil olacağı komissiya konsertə 10 gün qalmış onun repertuarına və mahnıların mətnlərinə baxacaqdır.
Bölmənin digər xəbərləri
