İlham Əliyev - Hər bir vətəndaşın Prezidenti
Bakı, 18 aprel, AZƏRTAC
Bu gün istər Beynəlxalq Valyuta Fonduna, istərsə də Dünya Bankına 150-dən çox ölkə yardım üçün müraciət edib. Bu isə onu sübut edir ki, dünya birliyinin mütləq əksəriyyətinin yardıma ehtiyacı var. Lakin cənab Prezidentin rəhbərliyi ilə həyata keçirilən düşünülmüş və praqmatik siyasət nəticəsində Azərbaycanın adına bu siyahıda rast gəlmirik. Belə ki, koronavirus infeksiyasının zərərlərinin minimallaşdırılması istiqamətində atılan bütün addımlar həm xalqımızın, həm də dövlətimizin maraqlarına uyğun addımlardır. Daha bir statistik rəqəmlə dünya təcrübəsinə nəzər yetirsək görürük ki, bu günə qədər dünyada 140 mindən çox insan bu amansız xəstəliyə uduzaraq həyatlarını itirib. Azərbaycanın malik olduğu statistika isə ilk dəfə olaraq bu dünya statistikasına “uduzur”.
Bu fikirləri AZƏRTAC-a açıqlamasında politoloq Şəbnəm Həsənova bildirib.
Şəbnəm Həsənova qeyd edib ki, COVID-19 infeksiyasının geniş vüsət almasına baxmayaraq, hazırda ölkə vətəndaşlarının normal həyat şəraitinin pozulmaması və insanların təhlükəsizliyinin təmin edilməsi Azərbaycan dövləti üçün prioritet məsələdir. Bu baxımdan Azərbaycanda əhalinin sosial müdafiəsinin gücləndirilməsi və məsələnin mənfi təsirlərini minimuma endirmək məqsədilə bir sıra tədbirlər həyata keçirilir.
İlkin olaraq koronavirus infeksiyası ilə ön cəbhədə mübarizə aparan səhiyyə işçilərinin əməyi yüksək dəyərləndirildi. Bundan əlavə, digər peşə sahiblərinin də əməyi yüksək qiymətləndirilir. Həkimlərimiz, Nazirlər Kabineti yanında Operativ Qərargahın məhdudlaşdırıcı tədbirlərinə riayət etməyə səsləyən polislərimiz, eyni zamanda, sosial işçilər yaşlı insanlara yardımlar edir, onların gündəlik qayğıları ilə yaxından maraqlanırlar. Elə bu səbəbdən cənab Prezidentin “Xüsusi karantin rejimi dövründə sosial xidmətlər göstərilməsində iştirak edən işçilərin sosial müdafiəsinin gücləndirilməsi haqqında” Sərəncamı 65 yaşdan yuxarı vətəndaşlara sosial xidmətlər göstərən sosial işçilərə verilən yüksək dəyər, həm də dövlətin onlara olan diqqət və qayğısının bariz nümunəsidir. Bu kateqoriyadan olan 15 mindən çox tənha yaşlıya evlərində sosial xidmətlər göstərilir.
Sosial işçilərin əməyinə verilən bu dəyər ölkəmizdə elan edilmiş xüsusi karantin rejimi dövründə çətin vəziyyətdə olan şəxslərə və tənha yaşayan 65 yaşdan yuxarı vətəndaşlara sosial xidmətlər göstərilməsinin səmərəli təşkili məqsədi daşıyır. Sosial işçi institutu da bu çətin günlərdə məsələyə öz müsbət töhfəsini verməklə özünü müsbət mənada fərqləndirməyə müvəffəq olub. Bu gün hamı yumruq kimi bir olaraq istər Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun rayon (şəhər) şöbələrində və tabeliyindəki sosial xidmət müəssisələrində çalışan işçilər, istər ölkənin müxtəlif İctimai birliklərinin və qurumlarının əməkdaşları öz dəstəyini əsirgəmir, milli həmrəylik nümayiş etdirir. Bu isə onu göstərir ki, koronavirus pandemiyası ilə mübarizədə fərqlənən hər bir vətəndaş özünü dövlət qayğısından kənarda hiss etmir. Sosial baxımdan həssas əhali qrupuna aid edilən ailələrin üzvü olan tələbələrin təhsil haqqı xərclərinin ödənilməsi, əhali üzrə elektrik enerjisinin aylıq istehlak həcminin tənzimlənməsi kimi müsbət istiqamətdə atılan addımlar bir daha sübut edir ki, ölkə başçımız hər bir təbəqədən və sosial qrupdan olan vətəndaşın həyatına xüsusi həssaslıqla yanaşır.
Məsələ tam nəzarət altındadır və dövlətimiz tədbirləri vəziyyətə uyğun şəkildə həyata keçirir. Cənab Prezidentin uğurlu sosial siyasəti nəticəsində bu günə qədər 80 min ailə, 300 mindən artıq fərd ünvanlı sosial yardım proqramı ilə əhatə olunub. Məhdudlaşdırıcı tədbirlərin mərhələli sərtləşdirilməsi, eyni zamanda, pandemiyadan ziyan çəkmiş sahələrdə çalışan insanların sosial müdafiəsinin təmin edilməsi birbaşa Prezidentimizin yürütdüyü praqmatik və çevik siyasətin uğurlu təzahürüdür. Ölkə başçımızın şəxsi təşəbbüsü və nəzarəti ilə inşa edilən 575 çarpayılıq “Yeni klinika” tibb müəssisəsi bu gün ölkəmizin ən müasir səhiyyə ocağıdır. Bundan əlavə, ölkəmizdə fəaliyyət göstərən 18 laboratoriya tibb işçilərinə bu amansız xəstəliklə mübarizə apararkən geniş imkanlar yaradır.
Bundan əlavə, cənab Prezidentin Əmək və Əhalinin Sosial Müdafiəsi naziri Sahil Babayev və İqtisadiyyat naziri Mikayıl Cabbarovun iştirakı ilə keçirdiyi videobağlantı formatında iclasında ümumi vəziyyəti nəzərə alaraq və insanların sosial müdafiəsini gücləndirmək üçün 200 min əvəzinə 600 min insana dövlətin iki ay ərzində hər ay 190 manat vəsait verməsi barədə tapşırığı nəinki ölkə başçımızın uğurlu sosial siyasətinin, bilavasitə və xüsusilə onun yüksək humanist keyfiyyətinin ən aydın ifadə formasıdır. Bu baxımdan tam əminliklə deyə bilirik ki, İlham Əliyev hər bir sosial təbəqə nümayəndəsi olan vətəndaşın Prezidentidir.
Bölmənin digər xəbərləri
