İndoneziyada qızıl mədənində torpaq sürüşməsi nəticəsində ölənlərin sayı 17-yə çatıb
Bakı, 9 iyul, AZƏRTAC
İndoneziyanın Qorontalo əyalətində yerləşən qızıl mədənində torpaq sürüşməsi nəticəsində azı 17 nəfər həlak olub. Hazırda xilasedicilər torpaq altında qalan insanların axtarışını davam etdirir.
AZƏRTAC Deutsche Presse-Agentur (DPA) agentliyinə istinadla xəbər verir ki, yerli fövqəladə hallar xidməti hadisə nəticəsində 45 nəfərin torpaq altında qaldığını güman edir. Eyni zamanda, xilasedicilər 50-dən çox insanı xilas etməyə nail olublar.
Ötən həftənin sonlarında güclü yağışlar Sulavesi adasındakı mədəndə də torpaq sürüşməsinə səbəb olmuşdu.
Qeyd edək ki, İndoneziyada qeyri-qanuni qızıl hasilatı geniş yayılıb. Burada yoxsul insanlar qiymətli metalı çıxarmaq üçün böyük təhlükələrlə üzləşirlər. Mədənlərdə təhlükəsizlik standartlarının olmaması səbəbindən mütəmadi olaraq ölümlə nəticələnən qəzalar baş verir.
Bölmənin digər xəbərləri
