İnfeksionist: Hazırda bütün dünyada olduğu kimi ölkəmizdə də influenza virusu yayılıb
Bakı, 8 fevral, AZƏRTAC
Soyuq havada insan orqanizminin immuniteti aşağı düşür. Bu səbəbdən soyuq havalar virus infeksiyalarının yayılmasına münbit şərait yaradır.
AZƏRTAC xəbər verir ki, bunu Səhiyyə Nazirliyinin mütəxəssis-eksperti, həkim-infeksionist Təyyar Eyvazov nazirliyin rəsmi instaqram səhifəsindəki canlı yayım zamanı deyib.
Onun sözlərinə görə, insanların soyuq havada qapalı məkanlara toplaşması xəstələnmə hallarının sayını artırır. “Payız-qış mövsümündə qrip virusu aktivləşir. Hazırda bütün dünyada olduğu kimi ölkəmizdə də influenza virusu yayılıb. Hər hansı virusa yoluxma zamanı ilk gündən qoruyucu tədbirlərə ciddi əməl edilməlidir. Əks halda xəstəlik ağırlaşa bilər. Müalicədə istifadə olunan dərmanlara gəlincə, bunun üçün ilk növbədə diaqnoz həkim tərəfindən təsdiqlənməlidir. Soyuqdəymə ilə qripi laborator müayinə olmadan təsdiqləmək mümkün deyil. Qripdə yüksək temperatur, üzün qızarması, quru öskürək, burun tutulması, huşunu itirmə, təzyiqin aşağı düşməsi kimi simptomlar müşahidə edilir. Bu kimi hallarda birinci addım özünütəcrid və vəziyyətdən asılı olaraq həkimə müraciətdir”, -deyə T.Eyvazov bildirib.
Bölmənin digər xəbərləri
