İngiltərədə 10 il ərzində 70 mindən çox sosial və münasib qiymətli mənzil tikiləcək
London, 25 avqust, AZƏRTAC
Britaniya hökuməti ölkədə mənzil böhranının aradan qaldırılması məqsədilə həyata keçirilən proqram çərçivəsində təxminən 10 milyard funt sterlinq həcmində ilkin maliyyələşdirmənin hansı bölgələrə ayrılacağını açıqlayıb.
AZƏRTAC BBC-yə istinadla xəbər verir ki, vəsait Böyük Mançester, Qərbi Midlend, Qərbi Yorkşir, Cənubi Yorkşir, İngiltərənin şimal-şərqi və Liverpulda yeni mənzillərin tikintisinə yönəldiləcək. Bundan əvvəl London üçün əlavə 6 milyard funt sterlinq ayrıldığı bildirilmişdi. Bu, hökumətin 39 milyard funt sterlinqlik sosial mənzil tikintisi proqramı çərçivəsində ölkə üzrə ümumilikdə 300 min sosial və münasib qiymətli mənzil inşa etmək planının ilk mərhələsidir.
Yeni mənzillərin 60 faizinin sosial kirayə üçün nəzərdə tutulacağı bildirilib. Sosial kirayə mənzillərində ödəniş adətən bazar qiymətlərinin təxminən yarısı səviyyəsində olur və bu mənzillər üçün müraciət edən şəxslər müəyyən meyarlara cavab verməlidirlər.
Bölmənin digər xəbərləri
