İngiltərədə həkimlər 5 günlük tətil elan edib
London, 2 dekabr, AZƏRTAC
Britaniya Tibb Assosiasiyası (BMA) əməkhaqqı mübahisəsi fonunda İngiltərədə həkimlərin yeni tətil qərarını açıqlayıb.
AZƏRTAC BBC-yə istinadla xəbər verir ki, rezident həkimlər 17 dekabrdan etibarən 5 günlük işə çıxmama aksiyası keçirəcək. Bu, 2023-dən bəri həkimlər ittifaqının elan etdiyi 14-cü tətildir. Bu tətilin xüsusilə xəstəxanalarda ciddi pozuntulara səbəb olacağı gözlənilir.
Assosiasiyadan bildirilib ki, həkimlərin uzunmüddətli əməkhaqqı problemi üzrə hökumətdən real və qənaətbəxş təklif gəlmədiyi üçün tətil qərarı qaçılmaz olub. Tətillər zamanı rezident həkimlər həm təcili yardım, həm də planlı tibbi xidmətlərdən geri çəkiləcək, xəstəxanalarda isə onların yerinə baş həkimlər və daha təcrübəli personal çalışacaq. Hökumət və BMA arasında danışıqların yaxın günlərdə davam edəcəyi gözlənilir.
Səhiyyə Xidmətinin rəhbərliyi isə tətildən narahatlığını ifadə edib. Qeyd olunub ki, Milad ərəfəsi səhiyyə sistemi ən çətin dövrlərdən birini yaşayır və hər kəsin iş başında olmasına ehtiyac var.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
