Bakı, 26 avqust (AZƏRTAC). Bir-birindən vacib və əhəmiyyətli layihələri həyata keçirərək siyasətçi, diplomat, ictimai xadim yolunu seçən Azərbaycanın birinci xanımı Mehriban Əliyevanın himayəsi altında reallaşan humanitar aksiyaların sayı-hesabı yoxdur. Qaçqın ailələrindən olan uşaqlara kömək, diabet və talassemiya xəstəliyindən əziyyət çəkən balacalara yardım, respublikadakı uşaq evlərinin və internat məktəblərinin əsaslı şəkildə yenidən qurulmasına dair möhtəşəm proqram, Azərbaycanın əsasən kənd yerlərində yeni məktəb binalarının, səhiyyə müəssisələrinin tikilməsi, Mehriban xanımın özünün şəxsən iştirak etdiyi müxtəlif xeyriyyəçilik aksiyalarının keçirilməsi artıq çoxdandır ki, ənənə halı almışdır. Ölkəmizdə və onun hüdudlarından kənarda insanlar onu məhz xeyirxah, humanist və nəcib işlərinə görə sevirlər.

Deyirlər insan həyatda vətənini, yaşadığı zamanı və mənsub olduğu ailəni seçə bilməz. Bütün bunlar Azərbaycanın birinci xanımı Mehriban Əliyevanın alın yazısı olsa da həyat yolunu və fəaliyyət dairəsini o, özü müəyyənləşdirmişdir, xeyirxahlıq yolunu seçmişdir.

Mehriban Əliyeva ölkəmizin ictimai-siyasi həyatında daim dövlətimizin başçısını müşayiət edərək ona dəstək olmuşdur. Azərbaycanın birinci xanımı Prezident İlham Əliyevin həyata keçirdiyi genişmiqyaslı quruculuq işlərinə ictimai dəstəyin artırılmasına ciddi töhfələr verir. Mehriban Əliyeva yaxın və uzaq xaricdə birinci ledilərlə şəxsi münasibətlər və dostluq əlaqələri yaratmaqla nümunə göstərir. Azərbaycanın birinci ledisi öz yüksək statusundan və təşkilatçılıq imkanlarından istifadə edərək ehtiyacı olanların problemlərinin həllinə çalışır.

Azərbaycanın birinci xanımının seçdiyi xeyirxahlıq yolu isə belə başlayıb: Azərbaycan üçün ağır bir dövrdə, respublikamızın “Qarabağ bəlaları”ndan yenicə özünə gəldiyi bir vaxtda Mehriban Əliyeva Azərbaycan mənəviyyatının xilas edilməsi və dirçəldilməsi kimi bir işə qol qoymuşdur. 1995-ci ildə Mehriban xanım Azərbaycan Mədəniyyətinin Dostları Fondunu yaratmışdır. Bu illər ərzində fondun himayəsi altında müxtəlif müsabiqələrdən, bədii sərgilərdən tutmuş xeyriyyə konsertlərinə və musiqi festivallarına qədər çoxsaylı layihələr həyata keçirilmişdir. Müxtəlif dövrlərdə icra olunmuş bütün bu layihələri birləşdirən əsas məram isə Azərbaycan xalqının mənəvi irsinin yüksək səviyyəsini qoruyub saxlamaqdır. Azərbaycanın birinci xanımının dövlətimiz və xalqımız qarşısında ən böyük xidməti 2004-cü ildə Heydər Əliyev Fondunun təsis edilməsi ilə bağlıdır. Fondun yaradılması ilə xeyriyyəçilik amalı Mehriban Əliyevanın fəaliyyətinin prioritetinə çevrilmişdir. Başqa sözlə desək o, öz qüvvəsini və fondun əməkdaşlarının səylərini əhalinin ən zəif müdafiə olunan təbəqələrinə yönəltmişdir. Fondun gördüyü işlər dünya ictimaiyyəti tərəfindən də layiqincə dəyərləndirilmişdir. 2007-ci il mayın 17-də Cenevrədə Dünya Səhiyyə Təşkilatının ali orqanı olan Dünya Səhiyyə Assambleyasının 60-cı sessiyasında Azərbaycanda səhiyyənin inkişafında, yeni xəstəxanaların açılmasında və onların müasir avadanlıqla təchiz edilməsində Mehriban Əliyevanın gördüyü işlər xüsusi vurğulanmışdır və Azərbaycanın birinci xanımına İhsan Doğramacı Ali Sağlamlıq Fondunun mükafatı təqdim edilmişdir.

Heydər Əliyev Fondu digər ölkələrin problemlərinə də biganə qalmır. Pakistanın Müzəffərabad şəhərində zəlzələ zamanı dağılan məktəb Heydər Əliyev Fondu tərəfindən yenidən tikilib. Bu məktəb zəlzələdən sonra ölkədə inşa olunan 5 min məktəb arasında ən yaxşısı və ən nümunəvisidir. Heydər Əliyev Fondu getdikcə öz fəaliyyət dairəsini genişləndirir. Fondun nümayəndəliklərindən biri Rusiyada fəaliyyət göstərir. Ölkəmizin tanıdılması ilə bağlı layihələrə həmişə böyük diqqətlə yanaşan Mehriban xanım Əliyeva Azərbaycan və onun paytaxtını, ölkəmizin zəngin və qədim mədəniyyətini, ənənələrini və müasir nailiyyətlərini tərənnüm edən “Baku” jurnalının Moskvada keçirilən təqdimat mərasimində şəxsən iştirak etmişdir. Azərbaycanın birinci xanımının fəaliyyəti son dövrlər çoxlu nüfuzlu beynəlxalq mükafatlarla və fəxri adlarla qeyd edilmişdir. 2007-ci ilin mayında Mehriban xanımın bəşəriyyətin ali ideyalarına xidmətdə qazandığı görkəmli nailiyyətlərə görə Moskvada “Qızıl ürək” mükafatı ilə təltif olunması onun təmənnasız əməyinə verilən layiqli qiymətlərdən biridir. Daha bir mükafatla Mehriban Əliyeva Heydər Əliyev Fondunun fəaliyyətinin 5 illiyinə həsr olunan mərasimdə təltif olunmuşdur. Prezident İlham Əliyev Azərbaycanın ictimai-siyasi və mədəni həyatında səmərəli fəaliyyətinə görə Heydər Əliyev Fondunun prezidenti Mehriban Əliyevaya “Heydər Əliyev Mükafatı”nı təqdim etmişdir.

Azərbaycan ictimaiyyətinin dərin rəğbətini qazanan, köməyə, yardıma ehtiyacı olanların hər zaman yanında olan Heydər Əliyev Fondu ulu öndərin amallarını rəhbər tutaraq ölkəmizin həyatı ilə bağlı mühüm layihələrə imza atmışdır. Ulu öndərin adını daşıyan fond ümummilli liderin arzu və istəklərinin, onun ideallarının həmişəyaşarlığını əks etdirən əsas mərkəzdir. Bununla belə, Heydər Əliyev Fondunu xalqımıza daha çox sevdirən onun fəlsəfəsidir. Bu fəlsəfənin əsasında çox sadə bir ideya və amal durur: İnsanlara yaxşılıq etmək.

Uşaq evlərində tərbiyə alan gənclərin mənzillə təmin olunması kimi daim cəmiyyətimizi narahat edən mühüm problemin həllinə də məhz Mehriban Əliyevanın xeyirxahlıq missiyası sayəsində nail olunmuşdur. Paytaxtdan başlayan və ilk növbədə qayğıya daha çox ehtiyacı olan, valideyn himayəsindən məhrum qız uşaqlarının mənzillə təmin olunmasını nəzərdə tutan layihənin icrası ölkəmizdə Mehriban Əliyevanın bu nəcib missiyanın nə qədər ali və müqəddəs olduğunu təsdiq etmişdir.

Uşaqlara qayğı və diqqət, gələcək nəslin fiziki və mənəvi cəhətdən sağlam böyüməsi Heydər Əliyev Fondunun fəaliyyətində prioritet istiqamətlərdən biridir. Uşaqlarımızın xoşbəxt gələcəyi üçün əlindən gələni əsirgəməyən Heydər Əliyev Fondunun prezidenti Mehriban Əliyevanın təşəbbüsü ilə hər il Dünya Azərbaycanlılarının Həmrəyliyi Günü və Yeni il ərəfəsində müxtəlif orta məktəblərin təhsildə fərqlənən şagirdləri, uşaq evləri və internat məktəblərində tərbiyə alan, qaçqın və məcburi köçkün ailəsindən olan, valideyn himayəsindən məhrum uşaqlar üçün şənlik təşkil edilir.

Heydər Əliyev Fondunun təhsillə bağlı qarşıya qoyduğu əsas məqsəd Azərbaycanda bu sahənin qloballaşan dünyanın tələbləri səviyyəsində qurulmasıdır. Təhsil sahəsində fondun ən böyük və irimiqyaslı işi - “Yeniləşən Azərbaycana yeni məktəb” Proqramı təhsilin səviyyəsinə birbaşa təsir edən problemlərin həllinə istiqamətlənmişdir. Bu proqram paytaxtla yanaşı, regionlarda da icra olunur. Heydər Əliyev Fondunun təhsillə bağlı həyata keçirdiyi proqramlar sırasında “Təhsilə dəstək” layihəsi də birbaşa tədrisin keyfiyyətinə təsir göstərən problemlərin həllinə, məktəblərin əyani vəsaitlə, şagirdlərin dərs ləvazimatı ilə təmin olunmasına yönəlmişdir. Fond hər yeni tədris ilində silsilə aksiyalar keçirməklə bu sahədə bir sıra problemlərin aradan qaldırılmasına əhəmiyyətli töhfə verir.

Heç şübhəsiz ki, Mehriban xanımın ən böyük mükafatı Milli Məclisin deputatı və ictimai xadim kimi xalqın məhəbbətini qazanmasıdır. Milli Məclisin deputatı qismində o, az vaxt ərzində millət vəkili seçildiyi paytaxtın Əzizbəyov rayonunu verdiyi vədlərə uyğun olaraq nümunəvi məkana çevirmişdir. Mehriban Əliyeva xalqın elçisi adına layiq olduğunu əməlləri ilə bir daha sübut etmişdir. Mehriban xanımın genişmiqyaslı amnistiya aktının qəbul edilməsi təşəbbüsü ilə Milli Məclisə müraciət etməsi onun deputat kimi fəaliyyətində yaddaqalan məqamlardan biridir.

Azərbaycanın birinci ledisi 2004-cü ildə şifahi xalq ədəbiyyatının və musiqi irsinin qorunub saxlanılması və inkişaf etdirilməsinə görə YUNESKO-nun, çoxşaxəli və genişmiqyaslı fədakar fəaliyyətinə, qayğıya ehtiyacı olan uşaqlara diqqətinə, təhsilin və səhiyyənin inkişafı sahəsində gördüyü işlərə görə isə 2006-cı ildə İSESKO-nun xoşməramlı səfiri adına layiq görülmüşdür. Xoşməramlı səfir Mehriban Əliyeva YUNESKO-nun tribunasından Azərbaycanın haqq səsini mütəmadi olaraq dünyaya çatdırır. Azərbaycan mədəniyyətini dünyaya daha yaxından tanıtmaq üçün isə Heydər Əliyev Fondu və onun prezidenti Mehriban Əliyevanın dəstəyi ilə Parisdə YUNESKO-nun qərargahında ölkəmizin gənc istedadlarının “Azərbaycanın xoşməramlı mələkləri” adlı konsert proqramı təqdim edilmiş və azərbaycanlı uşaqların rəsmlərindən ibarət sərgi açılmışdır. YUNESKO-nun xoşməramlı səfiri kimi Mehriban Əliyeva Azərbaycan dilinin və ədəbiyyatının təbliğində də mühüm rol oynayır. Fransanın ən məşhur ali məktəblərindən olan Şərq Dilləri və Mədəniyyətləri İnstitutunda (İNALCO) Azərbaycan dili fakültəsinin fəaliyyətə başlaması, Azərbaycan ədiblərinin, elm xadimlərinin, ziyalılarımızın YUNESKO-da yubileylərinin təşkil olunması Mehriban Əliyevanın Azərbaycan elminin, ədəbi dəyərlərinin inkişafı və təbliği yolunda gördüyü misilsiz xidmətlər sırasındadır.

Azərbaycan xalqının mədəni irsinin keşiyində duran Mehriban Əliyevanın fəaliyyəti sahəsində incəsənətimizin bir çox sahələri, xüsusilə də muğamlarımız Azərbaycan sərhədlərini aşaraq dünya miqyasında sevilmişdir. Mehriban Əliyevanın səyi ilə muğam YUNESKO-nun dünya qeyri-maddi mədəni irs siyahısına daxil edilmişdir. Mehriban Əliyevanın təşəbbüsü ilə görkəmli muğam ustalarının “dəyirmi masa”ları keçirildi. Bakıda Beynəlxalq Muğam Mərkəzinin yaradılması qərara alındı. Heydər Əliyev Fondunun muğam sənətinin qorunması və inkişafı istiqamətində həyata keçirdiyi tədbirlərdən biri “Azərbaycan muğamları” layihəsi çərçivəsində “Qarabağ xanəndələri” musiqi albomunun tərtib edilməsi oldu. Heydər Əliyev Fondunun dəstəyi, Azərbaycan Mədəniyyətinin Dostları Fondunun layihəsi əsasında Azərbaycan Televiziyasının keçirdiyi “Muğam televiziya müsabiqəsi-2007” də bu sahədə atılan addımlardan biri oldu. İndi əminliklə demək olar ki, mədəniyyətimizin hamisi olan Mehriban Əliyeva bu sənətin yaşamasını təmin edən ənənənin təməlini qoymuşdur. Bu ilin mart ayında keçirilən “Muğam aləmi-2009” Beynəlxalq müsabiqəsində 11 ölkədən 20 ən istedadlı ifaçı iştirak etmişdir. Onların bu müsabiqəyə qatılması bir daha muğamın Azərbaycana məxsusluğunu təsdiq etdi. Müsabiqə bu misilsiz sənət nümunəsinin yaşadılması və inkişafı yolunda ən ciddi addımların Azərbaycanda atıldığını göstərdi.

Avqust ayında isə artıq paytaxtda yox, Azərbaycanın ən gözəl guşələrindən birində - Qəbələdə Heydər Əliyev Fondunun prezidenti Mehriban Əliyevanın təşəbbüsü ilə Beynəlxalq musiqi festivalı keçirildi. Festivala dünyanın ən tanınmış musiqiçiləri gəlmişdilər. Əsl musiqi bayramına çevrilən bu tədbir çərçivəsində pianoçuların müsabiqəsi, musiqinin müxtəlif janrlarına aid konsertlər, ustad dərsləri keçirildi. Azərbaycan mədəniyyətinin təbliğinə yönələn bu festival həm də ölkəmizin musiqi ənənələrinin dünyada tanıdılmasına xidmət etmişdir.

Bu gün Azərbaycanın ayrı-ayrı bölgələrində bir çox tarixi abidələrin və dini məbədlərin bərpa olunması da məhz Mehriban xanımın adı ilə bağlıdır. Məscidlər və minarələr ucaldan Mehriban xanım kilsələrə, sinaqoqlara da diqqət və qayğı ilə yanaşır.

Azərbaycanın birinci xanımının fəaliyyət göstərdiyi daha bir sahə ölkənin idman ictimaiyyətinin xahişi ilə rəhbərliyə gəldiyi Gimnastika Federasiyasıdır. Nəticədə idmanın bu növündə artıq ciddi dönüş müşahidə edilir. Bədii gimnastika üzrə Avropa və dünya çempionatlarının Bakıda keçirilməsi respublikamızın yüksək idman potensialına malik bir ölkə kimi müsbət imicinin formalaşmasına çox ciddi təsir göstərmişdir. Mehriban xanımın Azərbaycan idmanına qayğısının bir epizodunu da xatırlamaq yerinə düşərdi. Pekində keçirilən son Olimpiya oyunlarında qızıl medal qazanan cüdoçumuz Elnur Məmmədlinin anasına telefon açaraq bu ailəni təbrik etməsi onun sadə və alicənablığının bariz nümunəsi idi.

Zahiri gözəlliyi və incə zövqü ilə seçilən Mehriban Əliyeva Azərbaycan üçün çox işlər görmüşdür. Amma onun siyasətçi və ictimai xadim kimi potensialı bununla tükənmir. Əsas dəstək isə onu sevən adi vətəndaşlardan və təbii ki, ailəsindən gəlir. Unutmaq olmaz ki, xalqın qayğılarına öz qayğıları kimi yanaşan Azərbaycanın birinci xanımı həm də üç övlad anasıdır. Çoxşaxəli, həmçinin gərgin ictimai fəaliyyətinə baxmayaraq, bu gözəl qadın sözün əsl mənasında ailəsinin xanımıdır. Mehriban Əliyeva öz analıq borcunu da unutmur. Övladlarına dost olmaqla yanaşı onları ölkəmizin əsl vətənpərvər vətəndaşları kimi tərbiyə edir. Azərbaycanın birinci xanımı dövlətimizin başçısının ən yaxın silahdaşı kimi xalqımızın rifahı naminə çətin və gərəkli yoldadır. Bu yol Azərbaycanımıza yeni uğurlar gətirəcək zəfər yoludur.

######