İnzibati icraçı vəzifələr üzrə keçirilən imtahanda iştirak edənlərdən 634-ü işə qəbul olunub
Bakı, 25 aprel, AZƏRTAC
Dövlət İmtahan Mərkəzi (DİM) aprelin 22-də inzibati vəzifələrin B növünə (inzibati icraçı vəzifələr) aid BA və BB qruplarına uyğun olan vəzifələr üzrə dövlət qulluğuna qəbul imtahanında iştirak etmiş namizədlərin yaş kateqoriyası və gender aspektləri haqqında statistik məlumatları açıqlayıb.
DİM-dən AZƏRTAC-a bildiriblər ki, imtahanda iştirak etmək üçün qeydiyyatdan keçən namizədlərin 1038 nəfəri kişi, 634 nəfəri isə qadın olub. Qeydiyyatdan keçən namizədlərdən kişilər üzrə 907 nəfər (qeydiyyatdan keçənlərin 87 faizi), qadınlar üzrə isə 572 nəfər (qeydiyyatdan keçənlərin 90 faizi) 20-34 yaş intervalında olanlardır. Ən yuxarı yaş qrupu (60-64 yaş intervalı) üzrə qeydiyyatdan keçənlərin ikisi kişi, biri isə qadındır. Lakin yuxarı yaş intervalına aid kişi və qadın namizədlərin heç biri imtahanda uğur qazana bilməyib. Ümumiyyətlə, imtahanda iştirak edən 45 yaşdan yuxarı namizədlərdən yalnız ikisi (kişi) imtahandan uğurla keçib.
Ümumilikdə imtahanda müvəffəqiyyət əldə edən kişi və qadınların 265 nəfəri (147 kişi və 118 qadın), 20‑24 yaş intervalında olan namizədlərdir. Bu yaş qrupu üzrə imtahandan iştirak edən kişilərin 51.4 faizi, qadınların isə təqribən 60 faizi müvəffəqiyyət qazanıb.
25-29 yaş intervalında isə 305 nəfər (187 kişi və 118 qadın) lazım olan balı toplaya bilib.
DİM-in rəsmi saytında verilmiş cədvəldən də göründüyü kimi imtahanda uğur qazanan namizədlərin 649 nəfəri, yəni təqribən 96 faizi yaşı 34-dək olan insanlardır. Bu göstərici fevralın 18-də keçirilmiş imtahanda da eyni idi. Bu onu göstərir ki, imtahanlarda uğur əldə edən namizədlər əsasən gənclərdir.
35-64 yaş intervalında olan və imtahanı uğurla keçən namizədlərin sayı 27 nəfərdir.
Xatırladaq ki, imtahanda iştirak etmək üçün qeydiyyatdan keçmiş 1672 namizəddən 676 nəfəri (40.4 faiz) müvəffəqiyyət əldə edib. Bu, fevralın 18-də keçirilmiş imtahanda qeydə alınan göstəricidən təqribən 10 faiz daha yaxşı nəticədir.
İmtahanda uğur əldə edənlərin faiz göstəricilərinin kişilər və qadınlar üzrə müqayisəsi göstərir ki, qadınların nəticələri az da olsa, daha yuxarıdır. Belə ki, imtahanda iştirak edən kişilərin 38 faizi, qadınların isə 44.5 faizi uğur qazanıblar.
Digər statistik məlumatlarla DİM-in rəsmi saytında tanış olmaq mümkündür.
Bölmənin digər xəbərləri
