İordaniya Azərbaycan ilə əməkdaşlığın daha da genişləndirilməsində maraqlıdır
Bakı, 31 oktyabr (AZƏRTAC). Oktyabrın 31-də Milli Məclisin sədri Oqtay Əsədov III Bakı Beynəlxalq Humanitar Forumunda iştirak etmək üçün Azərbaycana gəlmiş İordaniya Senatının keçmiş sədri Tahir Masiri ilə görüşmüşdür.
AZƏRTAC xəbər verir ki, qonağı səmimiyyətlə salamlayan Milli Məclisin sədri demişdir ki, İordaniya ilə Azərbaycan arasındakı siyasi əlaqələr yüksək səviyyədədir. İordaniya kralı II Abdullah ilə Azərbaycan Prezidenti İlham Əliyevin şəxsi dostluq əlaqələri dövlətlərimizin yaxın əməkdaşlıq etməsinə də böyük imkanlar yaratmışdır. 2009-cu ildə Azərbaycan Prezidenti İordaniyaya rəsmi səfər etmişdir. Səfər çərçivəsində iki dost dövlət arasında iqtisadi əməkdaşlığa dair bir sıra sənədlər imzalanmışdır ki, bunlar da əməkdaşlıq əlaqələrinin gələcək inkişafının əsasını qoymuşdur.
Bildirilmişdir ki, ticarət əlaqələrinin daha da inkişaf etdirilməsi üçün iş adamlarının və biznes strukturlarının nümayəndələrinin qarşılıqlı səfərlərinin təşkili zəruridir.
O.Əsədov İordaniya Senatında erməni millətçilərinin Azərbaycan xalqına qarşı həyata keçirdiyi Xocalı soyqırımı ilə bağlı bəyanat qəbul edilməsinə görə qonağa minnətdarlığını bildirmiş, iki dost dövlət arasındakı münasibətlərin gələcəkdə daha da möhkəmlənəcəyinə əminliyini ifadə etmişdir.
Səmimi görüşə görə təşəkkürünü bildirən Tahir Masiri demişdir ki, İordaniya Azərbaycan ilə əməkdaşlığın daha da genişləndirilməsində maraqlıdır.
Qeyd olunmuşdur ki, III Bakı Beynəlxalq Humanitar Forumunda müzakirə olunacaq məsələlər əlaqələrimizin inkişafını yeni müstəviyə yüksəldəcəkdir.
Görüşdə qarşılıqlı maraq doğuran digər məsələlər ətrafında da fikir mübadiləsi aparılmışdır.
Bölmənin digər xəbərləri
