İQTİSADİYYAT
İQTİSADİ İNKİŞAF NAZİRLİYİNİN MƏLUMATI
“Azərkontrakt” Səhmdar Cəmiyyətinin müəssisələrinin özəlləşdirilməsi haqqında” Azərbaycan Respublikası Prezidentinin 29 mart 2001-ci il tarixli Sərəncamının icrasını təmin etmək məqsədi ilə İqtisadi İnkişaf Nazirliyinin Dövlət əmlakının özəlləşdirilməsi departamenti “Azərmaşavadanlıq” Açıq Səhmdar Cəmiyyətinin səhmlərinin satışı üzrə investisiya müsabiqəsi elan etmişdib.
Müsabiqədə Azərbaycan Respublikasının investorları ilə yanaşı, xarici sərmayəçilər də iştirak edə bilərlər.
Müsabiqəyə yekun vurularkən müəyyən olunmuş şərtlər daxilində maksimum həcmdə investisiya təklif etmiş və onun səmərəli qoyuluşuna dair öhdəlik götürmüş iddiaçıya üstünlük veriləcəkdir.
İnvestisiya müsabiqəsində iştirak etmək üçün iddiaçılar müvafiq infrastruktur yaratmaqla, beynəlxalq standartlara cavab verən müasir topdansatış ticarət mərkəzinin yaradılması, iritutumlu gəmiləri qəbul edə biləcək müasir dəniz terminalının yaradılması, mövcud tikili və qurğuların bərpası, müasir anbar texnologiyasının tətbiqi, o cümlədən irihəcmli konteyner yükdaşımalarının təşkili, yeni iş yerlərinin açılması, işçilərin sosial təminatı məsələlərinin həllini özündə əks etdirən İnvestisiya proqramı təqdim etməlidir.
Müsabiqənin qalibi tərəfindən “Azərmaşavadanlıq” Açıq Səhmdar Cəmiyyətinə investisiya qoyuluşu yeni avadanlığın quraşdırılması və müasir texnologiyaların tətbiqinə, əhalinin mallarla və xidmətlərlə təminatının yaxşılaşdırılmasına, yeni iş yerlərinin açılmasına imkan verəcəkdir.
İddiaçılar həmçinin, 1 milyard 300 milyon manatdan az olmamaq şərti ilə pul vəsaitinin dövlət büdcəsinə ödənilməsinə, azı 48 min ədəd özəlləşdirmə çeklərinin təqdim edilməsinə dair təkliflər verməlidir. Xarici investorlar təklif edəcəkləri dövlət özəlləşdirmə çeklərinin sayına müvafiq dövlət özəlləşdirmə opsionları da təqdim etməlidir.
Müsabiqənin qalibi 30 iş günü müddətində təklif etdiyi pul vəsaitinin dövlət büdcəsinə köçürülməsini, təklif etdiyi sayda dövlət özəlləşdirmə çeklərinin /xarici investor olduqda, həm də dövlət özəlləşdirmə opsionlarının/ İqtisadi İnkişaf Nazirliyinin Dövlət əmlakının özəlləşdirilməsi departamentinə təqdim olunmasını, investisiyanın ümumi həcminin İnvestisiya proqramı ilə müəyyən edilmiş 5 faizə qədər hissəsini pul vəsaiti şəklində səhmdar cəmiyyətinin hesablaşma hesabına köçürülməsini təmin etməlidir.
Müsabiqədə iştirak etmək üçün ərizə və təkliflərin qəbulu 2001-ci il oktyabrın 12-dək, Müsabiqə komissiyası tərəfindən müsabiqə təkliflərinin qiymətləndirilməsi isə oktyabrın 16-dan başlayaraq həyata keçiriləcəkdir.
İnvestisiya müsabiqəsinin şərtləri ilə “Mülkiyyət” qəzetinin 8 sentyabr tarixli nömrəsində ətraflı tanış olmaq olar.