İran 16 milyon doza peyvənd almaq üçün 125 milyon dollar vəsait ayırıb
Tehran, 29 may, AZƏRTAC
İran 16 milyon doza peyvənd almaq üçün 125 milyon dollar vəsait ayırıb.
AZƏRTAC xəbər verir ki, bu barədə məlumatı İranın energetika naziri Rza Ərdakiyan verib. O bildirib ki, bu vəsait İranın İraq banklarında saxladığı maliyyə resurslarından ayrılacaq. Onun sözlərinə görə vəsait İraq bankından İsveçrə bankına köçürüləcək. İran bu vəsaitlə Rusiya istehsalı olan “Sputnik V” peyvəndi alacaq.
Qeyd edək ki, bu günə kimi İran Qırmızı Aypara Cəmiyyətinin xətti ilə ölkəyə 7 milyon 500 min doza peyvənd gətirə bilib. Lakin 82 milyon əhalisi olan İran üçün bu çox azdır.
Bu gün İranın Səhiyyə Nazirliyinin verdiyi açıqlamaya əsasən son 24 saat ərzində 7 min 107 nəfər virusa yoluxub, 173 nəfər isə həyatını itirib. Bununla da İranda yoluxanların ümumi sayı 2 milyon 893 min 218 nəfər, ölənlərin sayı isə 79 min 741-ə çatıb. Eyni zamanda xüsusi xəstəxanalarda müalicə alan 2 milyon 425 min 33 nəfər sağalaraq evə buraxılıb. Müalicəsi davam edən 4 min 296 nəfərin vəziyyəti ağır olaraq qalır. Aprel ayı ilə müqayisədə yoluxma və ölüm hallarında azalma müşahidə edilir.
Rabil Kətanov
AZƏRTAC-ın xüsusi müxbiri
Tehran
Bölmənin digər xəbərləri
