İran ilə Azərbaycan arasında ekologiya sahəsində əməkdaşlıq məsələləri müzakirə olunub
Tehran, 5 mart, AZƏRTAC
Martın 5-də Azərbaycanın İrandakı səfiri Bünyad Hüseynov bu ölkənin vitse-prezidenti, Ətraf Mühit Təşkilatının rəisi İsa Kələntəri ilə görüşüb.
AZƏRTAC xəbər verir ki, görüşdə iki ölkə arasında ekologiya və ətraf mühitin mühafizəsi, flora və faunanın qorunmasında qarşılıqlı əməkdaşlıq əlaqələrinin daha da genişləndirilməsi, eləcə də perspektivlər müzakirə olunub.
Bu sahədə Azərbaycanda görülən işlərdən danışan səfir Prezident İlham Əliyevin sərəncam və tapşırıqları ilə ekologiya sahəsində həyata keçirilən layihələrdən danışıb. Həmçinin quruda və suda yaşayan heyvanların bioloji müxtəlifliyinin və həyat fəaliyyətinin qorunub saxlanması istiqamətində iki ölkə arasında əməkdaşlıq əlaqələrinin yaradılmasını təklif edib. Diqqətə çatdırılıb ki, IDEA İctimai Birliyinin təsisçisi və rəhbəri Leyla Əliyevanın təşəbbüsü ilə bəbirlərin populyasiyasının bərpasına dair proqram həyata keçirilir. Bu sahədə iki ölkə arasında qarşılıqlı faydalı əməkdaşlıq yaradılması mümkündür.
Bünyad Hüseynov Araz transsərhəd çayının Ermənistanın sənaye müəssisələri tərəfindən çirkləndirilməsinin narahatlıq doğurduğunu vurğulayıb. İran və Azərbaycanın ekosisteminə vurduğu zərərdən danışıb.
Səfir 2014-cü ilin aprelində imzalanmış “Azərbaycan Respublikası Hökuməti və İran İslam Respublikası Hökuməti arasında Ordubad və Marazad Su Elektrik Stansiyalarının tikintisi və istismarı haqqında” Sazişə toxunaraq Araz çayının suyundan istifadəyə dair iki dövlət arasında səmərəli əməkdaşlığın mövcudluğunu vurğulayıb. Tərəflər SES-də istifadə üçün Araz çayından yönləndirdikləri suyu eyni həcmdə və eyni keyfiyyətdə çaya qaytaracaqlarına dair öhdəliklər götürüblər ki, bu da ekologiyanın mühafizəsi üçün əhəmiyyətlidir. Ötən il saziş İran və Azərbaycan parlamentləri tərəfindən təsdiq (ratifikasiya) olunub.
Görüşdə Xəzər dənizinin bioresurslarının qorunması və birgə istifadəsi məsələsi də müzakirə olunub. Dənizin suyunun təmiz saxlanılmasının vacibliyi nəzərə çatdırılıb.
İranın vitse-prezidenti İsa Kələntəri kənd təsərrüfatı naziri vəzifəsində işlədiyi dövrdə əvvəlcə Naxçıvan Muxtar Respublikasında, sonra isə Bakı şəhərində Azərbaycanın böyük oğlu Heydər Əliyev ilə keçirdiyi görüşləri xatırlayıb. Onun Azərbaycan xalqı və dövləti üçün böyük işlər gördüyünü söyləyib. Qeyd edib ki, bu gün Heydər Əliyevin layiqli davamçısı Prezident İlham Əliyevin Azərbaycanda həyata keçirdiyi abadlıq və quruculuq işlərinə dair eşitdiyi xəbərlər onu sevindirir. Azərbaycan Prezidentinin ekoloji problemlərin aradan qaldırılmasına xüsusi diqqət və qayğı göstərməsi təqdirəlayiqdir. Hazırda dünyada ekoloji problemlərin artdığını diqqətə çatdıran vitse-prezident hər iki ölkənin iqtisadiyyatında mühüm rol oynayan Araz çayı və Xəzər dənizinin ekoloji mühitinin qorunub saxlanılması və düzgün istifadəsinin zəruriliyini vurğulayıb. Bildirib ki, su hövzələrinin mühafizəsinə İran hökuməti xüsusi diqqət yetirir.
Vitse-prezident ekologiyanın qorunması və bərpası sahəsində İran ilə Azərbaycan arasında qarşılıqlı əməkdaşlığın vacibliyini vurğulayıb. Ekologiya sahəsində İranda həyata keçirilən tədbirlər haqqında məlumat verib.
Görüşdə ekoloji problemlərin aradan qaldırılması yolları və qarşılıqlı maraq doğuran digər məsələlər ətrafında da geniş fikir mübadiləsi aparılıb.
Rabil Kətanov
AZƏRTAC-ın xüsusi müxbiri
Tehran
Bölmənin digər xəbərləri
