İRAN İSLAM RESPUBLİKASININ PREZİDENTİ MƏHƏMMƏD XATƏMİNİN GƏNCƏYƏ SƏFƏRİ
Azərbaycanın və İranın dövlət bayraqları ilə bəzədilmiş Heydər Əliyev adına beynəlxalq hava limanında ali qonağın şərəfinə fəxri qarovul dəstəsi düzülmüşdü.
Milli geyimli oğlan və qız İran Prezidentinə gül dəstəsi təqdim etdilər.
İran İslam Respublikasının Prezidenti Məhəmməd Xatəmini Azərbaycanın Baş naziri Artur Rasizadə, xarici işlər naziri Elmar Məmmədyarov və digər rəsmi şəxslər yola saldılar.
Prezident Məhəmməd Xatəmini Gəncəyə səfərdə Baş nazirin birinci müavini Yaqub Eyyubov, xarici işlər nazirinin müavini Xələf Xələfov və digər rəsmi şəxslər müşayiət edirdilər.
X X X
İran Prezidenti Məhəmməd Xatəmi həmin gün Gəncəyə gəldi. Azərbaycanın və İranın dövlət bayraqları ilə bəzədilmiş hava limanında ali qonağı və onu müşayiət edən nümayəndə heyətini Gəncə şəhərinin rəhbərliyi, ziyalılar böyük mehribanlıqla qarşıladılar. Milli geyimli oğlan və qız İran Prezidentinə gül–çiçək dəstələri təqdim etdilər.
Maşın karvanı hava limanından dahi Azərbaycan şairi şeyx Nizaminin məqbərəsinə yola düşdü. Burada Prezident Məhəmməd Xatəmiyə və nümayəndə heyətinin üzvlərinə məqbərənin tarixi, son illər aparılan yenidənqurma və bərpa işləri barədə ətraflı məlumat verildi. İran İslam Respublikasının Prezidenti məqbərənin önünə əklil qoydu, dahi söz ustasının məzarını ziyarət etdi.
Sonra qonaqlar Nizami Gəncəvinin əsərlərinin motivləri əsasında açıq havada yaradılmış memarlıq kompozisiyasına tamaşa etdilər, məqbərənin önündə xatirə şəkilləri çəkdirdilər. Ulu Nizaminin məzarını ziyarət etməsindən məmnun qalan İran Prezidenti Məhəmməd Xatəmi məqbərinin xatirə kitabına ürək sözlərini yazdı.
Gəncəyə səfərdən xatirə olaraq, ali qonağa üzərində Nizaminin əsərlərinin motivlərinə dair rəsmlər olan saxsı küzə hədiyyə olundu. Sonra İran Prezidenti burada şəhər ictimaiyyətinin nümayəndələri ilə görüşüb, səmimi söhbət etdi.
Qədim Gəncə ilə tanışlıq şəhərin mərkəzində yerləşən, XVII əsrin memarlıq abidəsi olan Şah Abbas məscidində davam etdirildi. Burada dindarlarla görüşüb söhbət edən Məhəmməd Xatəmi məsciddə fəaliyyət göstərən mədrəsənin işi ilə də yaxından tanış oldu. Günorta namazından sonra ali qonaq onun görüşünə gələn şəhər sakinləri ilə səmimi söhbət etdi.
İran İslam Respublikasının Prezidenti Məhəmməd Xatəmi və nümayəndə heyətinin üzvləri avqustun 7-də vətənə yola düşdülər. Gəncə hava limanında ali qonağı Azərbaycan Baş nazirinin birinci müavini Yaqub Eyyubov, xarici işlər nazirinin müavini Xələf Xələfov, ölkəmizin Tehrandakı səfiri Abbasəli Həsənov, İranın Bakıdakı səfiri Əhəd Qəzai, Gəncə şəhərinin rəhbərliyi yola saldılar.
Bölmənin digər xəbərləri
