İRAN ÖZ FUTBOLÇULARINA KARİKATURALARINA QARŞI ETİRAZINI BİLDİRMİŞDİR

14.02.2006 [15:00]
Çap et
A⁺ A^-

AZƏRTAC Röyterə istinadla xəbər verir ki, İranın Almaniyadakı səfirliyi ölkəsinin futbolçularının karikaturalarını dərc etdiyinə görə Berlinin “Tagesşpigel” qəzetindən yazılı şəkildə üzr istəməyi tələb etmişdir.

Qəzetin 11 fevral tarixli nömrəsində verilmiş şəkildə dörd bığlı İran futbolçusu bədənlərinə “şəhid kəmərləri” bağlanmış halda təsvir olunmuşdur. Onların yanında dörd alman əsgəri dayanmışdır. Şəklin üstündə yazılmışdır: “Nə üçün alman ordusu dünya futbol çempionatında olmalıdır?”.

“Tagesşpigel”in fikrincə, karikatura Bundesver əsgərlərinin bu yay Almaniyada keçiriləcək dünya çempionatı oyunlarının mühafizəsinə cəlb olunmasının məqsədəuyğunluğu barədə ölkədə debatlar getməsi ilə əlaqədar dərc edilmişdir.

Xəbər verildiyi kimi, çempionata gedəcək İran vətəndaşları ciddi yoxlamadan keçiriləcək və ola bilsin, bəzilərinə ölkəyə gəlmək qadağan olunacaqdır.

İran səfirliyi bildirmişdir ki, qəzet rəsmən üzr istəməsə, məhkəməyə müraciət ediləcəkdir. Diplomatların fikrincə, “Tagesşpigel” idman mövzusundan siyasi məqsədlərlə istifadə edir.

Qəzetin redaktoru İran diplomatlarının bu karikaturanın dərcinə reaksiyasından təəssüfləndiyini söyləsə də, üzr istəməyi lazım bilməmişdir.

Karikaturanın müəllifi Klaus Ştutmann demişdir ki, onu hədələyirlər və mənzilindən getməli olmuşdur.