İrsi qan xəstəliklərindən əziyyət çəkənlərə dəstək
Şəki, 19 iyun, Mustafa Dadaşov, AZƏRTAC
Birinci vitse-prezident Mehriban Əliyevanın koronavirus (COVID-19) pandemiyası ilə əlaqədar ölkədə xüsusi karantin rejiminin tətbiq olunduğu dövrdə talassemiya və hemofiliya, eləcə də leykoz xəstəliyindən əziyyət çəkən insanlar, xüsusilə uşaqlar üçün qan ehtiyatının yaradılmasına dəstək çağırışına Şəki Şəhər İcra Hakimiyyətinin kollektivi də qoşulub.
AZƏRTAC-ın bölgə müxbiri xəbər verir ki, iyunun 19-da B.Eyvazov adına Elmi-Tədqiqat Hemotologiya və Transfiziologiya İnstitutunun nəzdindəki Mərkəzi Qan Bankının Şəki regional bölməsində keçirilən qanvermə aksiyasında şəhər icra hakimiyyəti aparatının əməkdaşları, həmçinin qəsəbə və kənd inzibati ərazi dairələri üzrə nümayəndələr fəal iştirak ediblər. Regional bölmənin həkim-hematoloqları tərəfindən həyata keçirilən xeyirxah aksiya zamanı 51 könüllü qan verib.
Toplanan qan laboratoriya müayinəsindən keçirildikdən sonra Mərkəzi Qan Bankına təhvil veriləcək və irsi qan xəstəliklərindən əziyyət çəkən insanların müalicəsində istifadə olunacaq.
Bölmənin digər xəbərləri
