Bakı, 24 fevral, AZƏRTAC

AZƏRTAC “Yüksəliş” müsabiqəsinin qaliblərinin həyat yolunu təqdim etməyə davam edir.

Budəfəki müsahibimiz üçüncü “Yüksəliş” müsabiqəsinin qalibi, SOCAR “Azərikimya” İstehsalat Birliyində Satınalmalar və təchizat şöbəsinin rəisi Fərid İsayevdir. O, 1990-cı ildə anadan olub. Orta təhsilini Sumqayıt şəhərində bitirib. Sumqayıt Dövlət Universitetinin İqtisadiyyat fakültəsinə qəbul olub. Bakalavriat təhsilini fərqlənmə ilə bitirən Fərid İsayev Azərbaycan Dövlət İqtisad Universitetinin Maliyyə fakültəsinin vergi və vergiqoyma ixtisası üzrə magistratura səviyyəsinə qəbul olub. Lakin bununla kifayətlənməyib, təhsilini xaricdə davam etdirib. 2019-cu ildə Vaşinqton Universitetinin Layihələrin idarə edilməsi üzrə Pre-Master proqramını bitirib. Böyük Britaniyanin York Universitetində və Fransanın Strasburq Universitetində logistika və təchizat zəncirinin idarə edilməsi üzrə MBA təhsili alıb. Layihələrin idarə edilməsi üzrə PMP və Satınalmaların İdarə edilməsi üzrə CIPS beynəlxalq akkreditasiyalara malikdir.

“Karyerama özəl sektorda tərcüməçi kimi başlamışam”

Fərid İsayev karyerasının uğurlu olmasında dil biliklərinin əhəmiyyətini vurğulayıb. Onun sözlərinə görə, ingilis və rus dillərini səlis bilməyi 2013-cü ildə hərbi xidməti bitirdikdən sonra bir neçə iş təklifini və təcrübə proqramlarını dəyərləndirməyə imkan verib: “Elə indi də xarici dil biliklərinə maliksinizsə, deməli, karyeranıza 1-0 hesabla irəlidə başlayırsınız. BMT-nin könüllü proqramlarında çalışdıqdan sonra rəsmi iş yeri olaraq karyerama özəl sektorda tərcüməçi kimi başlamışam. Lakin magistratura təhsili alarkən paralel əmək fəaliyyəti göstərmək asan deyildi. Bir neçə il Sumqayıtda yaşayıb, Xırdalanda işləyib, Bakıda təhsil alırdım ki, bu məni fiziki və zehni olaraq çox yorurdu. Xarici şirkətlərlə çalışdığım zaman yaxşı nəticələr olduğundan bir müddət sonra mənə xarici təchizat şirkətində işləmək təklif edildi. O zaman satınalmalar və təchizat sahəsi üzrə biliklərim olmasa da işə həvəslə başladım. Ümumiyyətlə, bu profil nəzəri biliklərdən çox yumşaq bacarıqlar tələb edir ki, bu aspekt də məni çox cəlb etmişdi. Bir neçə il özəl sektorda satınalmalar sahəsində çalışdıqdan sonra, 2016-cı ildə SOCAR-da satınalmalar üzrə elan olunmuş vakansiyaya müraciət etdim. Test və müsahibə mərhələlərindən keçib iş təklifi aldım. Həmin dövrdə bir neçə təklifim olsa da özünü reallaşdırmaq baxımından SOCAR mənə daha cəlbedici gəldi. 2016-cı ildən SOCAR “Azərikimya” İstehsalat Birliyində çalışmağa başladım, o cümlədən SOCAR-da icra olunan müxtəlif layihələrdə satınalma üzrə ekspert, böyük mütəxəssis və s. vəzifələrdə çalışmışam. Hazırda “Azərikimya” İstehsalat Birliyində Satınalamalar və təchizat şöbəsinin rəisiyəm. Əsas uğurum işimi sevməyimdir, bu mənim iş effektivliyimin əsas stimulyatorudur. Çalışdığım komanda və rəhbərlərim də bu stimulun əsas amillərindəndir.

Layihədə iştirak edən könüllüdən, SOCAR-ın istehsalat birliyinin şöbə rəisinə qədər gedən 10 illik yol asan olmayıb. Bu yolda baryer olan xarici amillər da az deyildi, lakin əzmkarlıq və məqsədyönümlülük bütün maneələri aşmağa kömək edir. Karyerasına yeni başlayanlara da tövsiyəm çətinliklərə müvəqqəti amil kimi yanaşmaqdır. İnkişafı ləngitmək olar, lakin qarşısını almaq mümkün deyil. Dəqiq hədəfiniz və əməyiniz sizin əsas silahlarınızdır”.

“Komandaya ailə kimi baxmağın tərəfdarı olanlardanam”

Fərid İsayev həm idarəetmə, həm də inkişafda liderin və rəhbərin rolunun fundamental olduğunu düşünür. O bildirib ki, rəhbərləri karyerasında çox önəmli rol oynayıblar: “Bir tərəfdən müəllim rolunda olublar, digər tərəfdən indiki mövqeyə qədər qalxmağım belə ədalətli rəhbərlərlə işləməyimin nəticəsidir. Düzgün bacarıqların aşılanması, doğru qərarların qəbulu və işçinin ədalətli dəyərləndirilməsi yaxşı rəhbərin əsas xüsusiyyətlərindəndir. Bəlkə də bu mühafizəkar səslənəcək, lakin mən komandaya ailə kimi baxmağın tərəfdarı olanlardanam. Ümumiyyətlə, müşahidəm onu göstərir ki, ən yaxşı rəhbərlər sağlam ailə düşüncəli rəhbərlərdir. Şəxsi həyatda öz yaxınlarına qarşı ədalətsiz və qeyri-adekvat davranan insan, yad insanlara - işçilərinə qarşı düzgün davranış nümayiş etdirə bilərmi?

Rəhbərin daha bir vacib öhdəliyi optimal iş mühitinin yaradılmasıdır. İşçilər özünü mənəvi və psixoloji baxımdan rahat hiss etməli, lakin məsuliyyət də öz yerində olmalıdır. Yalnız bu balansı qorumaqla uğurlu nəticələrlə və harmoniyaya nail olmaq mümküdür”.

“Daha çox sevdiyim məşğuliyyət səyyahətdir”

İşi zehni əmək və mütəmadi kommunikasiya tələb etdiyindən Fərid İsayev daha çox passiv istirahətə üstünlük verdiyini söyləyib: “Lakin ən sevdiyim məşğuliyyət səyyahətdir, ölkə daxilində ya xaricində olmasının fərqi yoxdur. Çalışıb periodik olaraq iş mühitindən çıxmaq lazımdır. Gündəlik və adət edilmiş işlərin səni passivləşdirməməsi üçün yeni yerlər, insanlar, məşğuliyyətlər kəşf etmək vacibdir. Belə bir deyim var, insan uzun müddət nəyisə edəndə bunu niyə etdiyini unudur. Bu səbəbdən tez-tez fərqli mühitlərə və məşğuliyyətlərə meyil etmək vacibdir”.

“İmtahanlar səbəbindən yarışa qatıla bilmədim”

Fərid İsayev “Yüksəliş” müsabiqəsinə qoşulmağının dostlarının tövsiyəsi olduğunu deyib. Müsahibimiz özünü sınamaq üçün və təcrübədə əldə etdiyi yumşaq bacarıqları yoxlamaq üçün müsabiqənin yaxşı şans olduğunu düşünür: “Çünki çalışdığım profil, satınalmalar da daha çox bu bacarıqları tələb edir. Problemlərin həll edilməsi, tapşırıqların icrasının idarə edilməsi, kommunikasiya, prioritetlərin bölüşdürülməsi, komandada iş və s. aspektlər mənim çalışdığım sahə üçün labüddür. Bu baxımdan istədim ki, əldə olunmuş bilik və bacarıqlarımı sınayım. İkinci “Yüksəliş” müsabiqəsində qeydiyyatdan keçsəm də yarışın test mərhələləri MBA təhsilimdəki imtahanlar ilə üst-üstə düşdüyündən yarışa qatıla bilmədim. Üçüncü “Yüksəliş” müsabiqəsi ilk təcrübəm idi və ilk dəfədən qalib ola bildim”.

“Qərar verməli və rolunu təyin etməlisən”

Müsabiqənin mentor mərhələsi Fərid İsayev üçün ən maraqlı və faydalı mərhələ olub. O bildirib ki, bu mərhələdə keçirilən oyunda komandaları tapşırıqları yerinə yetirən zaman iqtisadiyyat naziri Mikayıl Cabbarovun yüksək idarəetmə təcrübəsindən öyrənmək imkanı əldə ediblər: “Əlbəttə, bu cür səriştəli rəhbərlə ünsiyyətdə olmaq bir tərəfdən məsuliyyəti artırırdı, lakin mentorun tətbiq etdiyi bacarıqlar oyunun dinamikasına birbaşa təsir edirdi və bəzi çatışmazlıqları aşkar etməyə kömək oldu.

Qalib olduqdan sonra mentorlarımdan biri Mikayıl Cabbarov oldu; bu da bir qismət. Beləliklə, bilik və idarəetmə üzrə bacarıqlarımı artırmaq imkanım genişləndi. Ümumiyyətlə, fikrimcə, “Yüksəliş” müsabiqəsinin ən böyük töhfəsi top menecerlər və strateji rəhbərlərdən öyrənmək şansıdır.

Finalın son günü daha həyəcanlı oldu. Əvvəlki günlərdəki oyunların yorğunluğu, “bu, son şansdır” effekti və maksimal potensialı göstərmək arzusu iştirakçılarda gərginlik yaradırdı. Bu gərginlik də birbaşa komanda oyunlarında öz əksini tapırdı. Düşünürəm ki, ən böyük çətinlik özündəki gərginliyin və son günün stresinin fonunda öz fikirlərini və emosiyalarını idarə etmək idi. Həmçinin təşəbbüskarlıq və komanda oyunu arasında balansı saxlamaq asan deyildi. Qərar verməli və rolunu təyin etməlisən - komandanın lokomotivisən, koordinatorusan, müəllimisən və ya oyunçusu? Real iş mühitində də bu sual aktualdır”.

“Yol göstərənlərim bu işdə peşəkardırlar”

Müsahibimiz müsabiqədə qalib olmasının ilk olaraq özünəinamına təsir göstərdiyini söyləyib. Fikrimcə, sınaqdan keçirmək istədiyi bacarıqların nəticə verməsi doğru yolda olduğunun göstəricisi idi: “Digər tərəfdən, çox sayda istedadlı və bacarıqlı rəhbərlərlə tanış oldum. Onların fonunda hələ inkişaf etdirilməsi çox aspektlərimin olduğunu anladım.

Lakin əsas dəyişiklik təyin olunmuş mentorlarla, SOCAR-ın prezidenti Rövşən Nəcəf və iqtisadiyyat naziri Mikayıl Cabbarov ilə keçirilən görüşlərin effekti fonunda baş verir. Hansı istiqamətdə getmək istəyimi və hansı xarakteristikaları inkişaf etdirməli olduğumu artıq tam anlayıram. Qarşımdakı yolun uzun olduğu aydındır, lakin xoşbəxtlikdən yol göstərənlərim bu işdə peşəkardırlar”.

“Müsabiqədə iştirakı hər kəsə məsləhət görürəm”

Fərid İsayev müsabiqəyə qatılmaq istəyənlərə müraciət edib: “İlk olaraq müsabiqədə iştirakı hər kəsə məsləhət görürəm. İştirakçılar nəinki özlərini sınamağı bacaracaqlar, həmçinin fundamental təcrübə qazanacaqlar və yeni tanışlıqlar əldə edəcəklər.

İştirakçılara tövsiyəm komanda oyununa kompleks yanaşmaqdır. Bütün opponentləri nəzərə alıb, situativ davranmaq çox vacibdir. Real həyatda olduğu kimi, müsabiqədə də emosiyaların idarə edilməsi və empatiya vacib amillərdir. Unutmasınlar ki, müsabiqənin son mərhələləri daha çox yumşaq bacarıqların yoxlanılmasına fokuslanır. Burada bir strategiya ilə çıxış etmək və ya özünə obraz düşünmək effektiv olmayacaq, çünki komandalar və oyun şərtləri periodik dəyişir. Situativ davranma daha adaptiv və doğru yanaşma ola bilər”.

Xatırladaq ki, “Yüksəliş” müsabiqəsi Azərbaycan Prezidentinin 2019-cu il 26 iyul tarixli Sərəncamına əsasən təsis olunub. Müsabiqənin məqsədi 21-51 yaş aralığında intellektual səviyyəsi və ikiillik idarəçilik təcrübəsi olan perspektivli rəhbər şəxslərin müəyyənləşdirilməsini, dəstəklənməsini və ölkədə kadr ehtiyatı bankının yaradılmasını təmin etməkdir.

“Yüksəliş” müsabiqəsinin qalibini bir il ərzində idarəçi rəhbərlərdən – böyük şirkətlərin top-menecerlərindən və dövlət orqanlarının rəhbərlərindən fərdi karyera məsləhətləri almaq imkanı və 20 min manat dəyərində pul mükafatı gözləyir.

Növbəti - dördüncü “Yüksəliş” müsabiqəsinin keçirilməsi ilə bağlı Azərbaycan Prezidenti tərəfindən 2023-cü il dekabrın 25-də Sərəncam imzalanıb.