İşğaldan azad olunmuş ərazilərin bərpası üçün Azərbaycan dövləti siyasi iradə nümayiş etdirir - ŞƏRH
Bakı, 11 may, AZƏRTAC
Otuz ilə yaxın davam edən işğal zamanı ermənilər tərəfindən vəhşicəsinə dağıdılmış Qarabağ və Şərqi Zəngəzur bu gün dirçəliş dövrünü yaşayır. Keçmiş məcburi köçkünlərin doğma torpaqlarına qayıtması, orada layiqli şəkildə yaşaması üçün genişmiqyaslı tədbirlər görülür. Artıq Böyük Qayıdış uğurla reallaşmaqdadır. Zəngilan şəhərinə və Cəbrayılın Şükürbəyli kəndinə qayıdışın reallaşması da bunun göstəricisidir.
Bu fikirləri AZƏRTAC-a açıqlamasında Milli Məclisin deputatı Samir Vəliyev söyləyib.
O bildirib ki, Böyük Qayıdış proqramı çərçivəsində Qarabağ və Şərqi Zəngəzurda şəhər və kəndlər yenidən tikilir, infrastruktur layihələri icra olunur, yollar inşa edilir, yeni istehsal müəssisələri yaradılır, yaşıllıqlar salınır, ərazilər mina və partlamamış hərbi sursatlardan təmizlənir, keçmiş məcburi köçkünlər mərhələli şəkildə doğma yurdlarında məskunlaşırlar: “İşğaldan azad edilən ərazilərdə genişmiqyaslı tikinti-quruculuq işlərinin həyata keçirilməsi, şəhər və kəndlərin yenidən qurulması, “ağıllı kənd” və yaşayış məhəllələrinin salınması, infrastruktur layihələrinin icrası, istehsal və digər iqtisadi obyektlərin yaradılması keçmiş məcburi köçkünlərin Qarabağ və Şərqi Zəngəzura qayıdışına və əzəli torpaqlarımızda layiqli yaşayışına hesablanıb.
Hər iki iqtisadi rayonda aparılan tikinti-quruculuq işlərinin nəticəsidir ki, həm Şərqi Zəngəzura, həm də Qarabağa Böyük Qayıdış möhtəşəmdir. Böyük Qayıdış Proqramına uyğun olaraq, 2022-ci ildə Zəngilanın Ağalı kəndinə başlanan köç prosesi hazırda azad olunmuş digər ərazilərdə uğurla davam edir. 30 ildən artıq məcburi köçkünlük həyatı yaşayan soydaşlarımız böyük sevinc və qürur hissi ilə doğma yurd-yuvalarında məskunlaşırlar.
Hazırda Qarabağda və Şərqi Zəngəzurda ora köçürülən keçmiş məcburi köçkünlərlə yanaşı, bu bölgədə aparılan layihələrin icrasında çalışan, həmçinin ayrı-ayrı dövlət qurumlarının yerli bölmələrində xidməti vəzifələrini yerinə yetirən, yenidən fəaliyyətə başlamış səhiyyə, təhsil, mədəniyyət, turizm, sənaye, energetika müəssisələrində işləyən ümumilikdə onminlərlə insan yaşayır”.
"İşğaldan azad olunmuş ərazilərimizin ən yüksək səviyyədə bərpası üçün dövlətimiz siyasi iradə nümayiş etdirir. Prezident İlham Əliyevin bəyan etdiyi kimi, Qarabağ və Şərqi Zəngəzur cənnətə çevriləcək. Eyni zamanda, Birinci vitse-prezident Mehriban xanım Əliyevanın rəhbərliyi ilə Heydər Əliyev Fondu azad olunmuş ərazilərdə tarixi, mədəni və dini abidələrimizin bərpası istiqamətində böyük işlər görür. Həmin ərazilər yalnız keçmiş köçkünlərin qayıdışı ilə məhdudlaşmır, həm də dünyanın diqqət mərkəzindədir. Azad edilmiş şəhərlərdə nüfuzlu beynəlxalq tədbirlərin keçirilməsi buna sübutdur. Bütün bunlar isə çox qürurvericidir" - deyə Samir Vəliyev vurğulayıb.
Deputat qeyd edib ki, bugünlərdə Prezident İlham Əliyevin və birinci xanım Mehriban Əliyevanın azad edilmiş ərazilərə növbəti səfəri, bərpa işləri ilə tanışlığı və doğma yurdlarına qayıdan insanlarla görüşmələri tarixi hadisədir: “Dövlətimizin başçısı Zəngilan şəhərinə ilk qayıdan sakinlərlə görüşü zamanı deyib ki, bu qayıdışın 10 mayda - Ulu Öndər Heydər Əliyevin anadan olmasının 103 -cü ildönümündə reallaşması rəmzi məna daşıyır. Çünki Heydər Əliyevin bütün həyat və fəaliyyəti Azərbaycan xalqına həsr olunub. 1992-1993-cü illərdə AXC-Müsavat hakimiyyətinin səriştəsizliyi nəticəsində torpaqlarımızın işğalı ilə yanaşı, dövlətçiliyimiz məhv olmaq təhlükəsi ilə üzləşmişdi. Məhz Heydər Əliyevin hakimiyyətə tarixi qayıdışı nəticəsində xalqımız təhlükələrdən xilas oldu və Azərbaycan inkişaf yoluna çıxdı. Heydər Əliyevin müəyyənləşdirdiyi siyasət sayəsində Azərbaycan inkişaf edərək gücləndi və bu siyasətin layiqli davamçısı Prezident İlham Əliyevin rəhbərliyi ilə ölkəmizin ərazi bütövlüyü və suverenliyi bərpa olundu”.
Hazırda regionda sülh üçün praktiki addımlar atıldığını deyən deputat bu təşəbbüsün müəllifinin Azərbaycan olduğunu xatırladıb. Onun sözlərinə görə, indi bəzi beynəlxalq dairələr sülhə süni əngəllər yaratmağa çalışır və guya Ermənistanı Azərbaycandan qoruyurlar: “Prezident İlham Əliyevin dediyi kimi, Ermənistanı Azərbaycandan qorumaq lazım deyil. Çünki biz öz məqsədimizə, yəni ərazi bütövlüyümüzün və suverenliyimizin bərpasına nail olmuşuq. Bu yaxınlarda Ermənistanda səfərdə olan Fransa prezidenti Makron qeyri-ciddi fikirlər səsləndirib. Əslində, onun İkinci Qarabağ müharibəsi dövründə Ermənistana yardım cəhdləri iflasa uğramışdı. Bundan sonra da Fransanın beynəlxalq müstəvidə Azərbaycana qarşı qərəzli kampaniyaları heç bir nəticə vermədi. Çünki Azərbaycanın mövqeyi beynəlxalq hüquqa və ədalətə əsaslanır. Hazırda, Ermənistanda revanşist qüvvələr hakimiyyətə gəlməyə çalışır ki, bu da ilk növbədə erməni xalqı üçün təhlükədir. Bundan sonra Azərbaycana qarşı hər hansı təxribatlar olarsa, onlara tutarlı cavab veriləcək”.
"Sülh yolunda vacib amillərdən biri regional kommunikasiyaların açılmasıdır. Bu gün Zəngəzur dəhlizinin reallaşması üçün praktiki addımlar atılır. Bu baxımdan, Zəngilan rayonu da tezliklə logistika mərkəzinə çevriləcək" - deyə S.Vəliyev vurğulayıb.
Bölmənin digər xəbərləri
