İstanbulda “SAHA 2026” Beynəlxalq Müdafiə və Aerokosmik Sərgisinin rəsmi açılışı olub VİDEO
İstanbul, 5 may, AZƏRTAC
Bu gündən İstanbulda “SAHA 2026” Beynəlxalq Müdafiə və Aerokosmik Sərgisi işə başlayıb.
AZƏRTAC xəbər verir ki, sərginin rəsmi açılış mərasimi keçirilib.
Ümumilikdə 400 min kvadratmetr sahədə təşkil edilən, 120-dən çox ölkədən iştirakın gözlənildiyi sərgidə 263-ü beynəlxalq olmaqla 1700-dən artıq şirkət, 200 mindən çox ziyarətçi və 30 mindən çox sahə mütəxəssisi iştirak edir.
Azərbaycan tədbirdə Müdafiə Nazirliyi və Müdafiə Sənayesi Nazirliyi tərəfindən rəhbərlik səviyyəsində təmsil olunur.
Sərgi çərçivəsində 30 mindən artıq görüş planlaşdırılır ki, bu da tədbiri nümayiş platformasından çıxararaq birbaşa biznesin inkişafı, təchizat zəncirinin uyğunlaşdırılması və strateji tərəfdaşlıqların qurulması məkanına çevirəcək. Sərgi çərçivəsində imzalanacaq ixrac müqavilələrinin həcminin ən azı 8 milyard dollara çatdırılması hədəfi qoyulub. Qeyd edək ki, “SAHA 2024”də bu rəqəm 6,2 milyard dollar olub.
Tədbirdə 203 yeni məhsulun təqdimatı və 164 imza mərasiminin keçirilməsi planlaşdırılır.
Yüksək texnologiyalı və innovativ məhsulların ilk dəfə qlobal ekosistemə təqdim olunacağı sərgidə pilotsuz quru nəqliyyat vasitələri və rover tipli sistemlər də xüsusi sahələrdə nümayiş etdiriləcək.
Türkiyənin Hərbi Dəniz Qüvvələrinə aid platformalar da ziyarətçilər üçün açıq olacaq. Belə ki, dünyanın ilk SİHA gəmisi kimi tanınan “TCG Anadolu” başda olmaqla Türkiyə Hərbi Dəniz Qüvvələrinə məxsus gəmilər İstanbulun Ataköy Marina və Sarayburnu Limanında yerləşdiriləcək, yerli pilotsuz dəniz vasitələri sərgilənəcək.
Tədbirdə KOBİ-lərin qlobal bazarlara çıxışı və beynəlxalq əməkdaşlıqlara inteqrasiyası dəstəklənəcək.
Tədbirin daha bir əsas mövzu isə aerokosmik ekosistemidir. Bu məqsədlə xüsusi Kosmos Pavilyonu və “Space Dome” zonası yaradılaraq kosmik texnologiyalar daha geniş şəkildə nümayiş etdirilir.
Qeyd edək ki, Türkiyə müdafiə sənayesi şirkətləri yeni məhsulları ilə tədbirdə iştirak edir.
Bölmənin digər xəbərləri
