İsti hava bu il Almaniyada 9800 nəfərin həyatına son qoyub
Bu il Almaniyada yüksək temperaturla əlaqədar ölüm hallarının sayı son on ilin rekord həddinə çatıb.
AZƏRTAC xəbər verir ki, Robert Kox İnstitutunun hesabatına əsasən, aprelin 6-dan iyulun 19-dək ölkədə isti hava səbəbindən təxminən 9800 nəfər həyatını itirib. Bu göstərici 2016-cı ildən bəri qeydə alınmış rəqəmi üstələyib. Əvvəlki ən yüksək göstərici 2018-ci ildə qeydə alınmışdı, həmin il təxminən 9 min nəfər isti hava ilə əlaqədar dünyasını dəyişib.
İnstitutun məlumatına görə, ölüm hallarının 5 mindən çoxu iyunun ikinci yarısındakı istilik dalğası dövrünə təsadüf edib. Həmin vaxt Almaniyanın bir çox bölgələrində havanın temperaturu 40 dərəcəyə çatıb, bəzi bölgələrdə isə 40 dərəcəni ötüb. Təkcə iyulun 13-19-da daha 1900 nəfərin isti hava səbəbindən öldüyü təxmin edilir.
Robert Kox İnstitutu istilərin xüsusilə yaşlı insanlar üçün təhlükəli olduğunu qeyd edərək bildirib ki, ölənlərin 5 mindən çoxunun yaşı 85 və daha yuxarı, 630 nəfər isə 65 yaşdan aşağı olub.
Elvin Mövsüm
Bölmənin digər xəbərləri
