İsveç parlamentinin sədri rəsmi səfərlərə icarəyə götürülmüş şəxsi təyyarə ilə uçur
Stokholm, 26 yanvar, Nərgiz Cəfərli, AZƏRTAC
İsveç parlamentinin sədri Andreas Norlen rəsmi səfərlərə icarəyə götürülmüş şəxsi təyyarə ilə uçur.
AZƏRTAC bu barədə yerli medianın araşdırmasına istinadla xəbər verir.
2025-ci ilin yayında Andreas Norlen parlament sədrlərinin ümumdünya konfransında iştirak etmək üçün Cenevrəyə səfər edib. Onunla birlikdə heç bir rəsmi vəzifə tutmayan həyat yoldaşı, oğlu, Riksdaqın iki əməkdaşı və Yaponiyadan olan nümayəndə heyəti də olub.
Spiker qeyd edib: “Heç kimi narahat etmədən və ya xüsusi narahatlıq yaratmadan həyat yoldaşımı və oğlumu bu rəsmi səfərə özümlə apara biləcəyimi biləndə, bundan çox məmnun oldum”.
Hökumət laynerinin texniki səbəblərə görə uçuşunun ləğvi səbəbindən İsveç Silahlı Qüvvələri özəl biznes təyyarəsini icarəyə götürüb.
Silahlı Qüvvələr üçün səfərin ümumi dəyəri 660.000 İsveç kronunu (təxminən 63.000 dollar) keçib. Riksdaqın özü dövlət təyyarələrinin istifadəsi üçün yalnız müəyyən edilmiş tənzimləyici rüsumu ödəyib (55.800 kron və ya 5.300 ABŞ dolları). Bu, faktiki xərclərin kiçik bir hissəsidir.
Təyyarənin icarə haqqı 47.100 avro (52.000 ABŞ dolları) təşkil edib. Əlavə 20.000 kron (1.900 ABŞ dolları) uçuş zamanı yeməklərə, o cümlədən spikerin ailə üzvləri, Yaponiya nümayəndə heyəti üçün xüsusi qidalara xərclənib. Əlavə xərclərə geri dönüş uçuşu üçün yanacaq və Arlanda hava limanında VIP xidmətləri (69.800 kron və ya 6.600 ABŞ dolları) daxildir.
Əvvəlcə, spiker üçün planlaşdırılmış uçuş nəzərdən keçirilib. Parlamentin sədri və iki əməkdaş üçün gediş-dönüş biletlərinin qiyməti təxminən 17.000 kron (1600 dollar) olardı. Lakin Riksdaq Yaponiya qarşısındakı öhdəliklərə görə səfərin ləğv edilməsini qəbuledilməz hesab edib və şəxsi təyyarə icarəyə götürməkdə israrlı olub.
Media sorğularından sonra Andreas Norlen öz maaşından 11.318 kron (təxminən 1080 dollar) tutub. Bu məbləğ həyat yoldaşı və oğlunun planlaşdırılmış reyslə uçması xərcinə bərabərdir. O, Silahlı Qüvvələrin faktiki xərclərini tam başa düşmədiyini, təyyarədən istifadə qərarının çeviklik və diplomatik maraqlar nəzərə alınmaqla verildiyini bildirib.
Riksdaqın hesablamalarına görə, bu səfərə xərclənən məbləğlə spiker Stokholm və Cenevrə arasında 117 planlaşdırılmış uçuş edə bilərdi. Norlen özü etiraf edib ki, əvvəlcədən şəxsi təyyarə icarəyə götürmək ehtiyacını bilsəydi, fərqli bir qərar verərdi.
Bölmənin digər xəbərləri
