İsveçdə şagird dərsdən tez çıxmaq üçün məktəbdə yanğın törədib
Stokholm, 19 oktyabr, Nərgiz Cəfərli, AZƏRTAC
Malmödə məktəbi vaxtından tez tərk etmək istəyən şagird tualetdə yanğın törədib. Məktəb dəhlizləri tüstü ilə dolduğundan bina boşaldılıb.
AZƏRTAC xəbər verir ki, ilkin hesablamalara görə, dəyən ziyan təqribən 500 min dollar təşkil edəcək.
Bir neçə nəfər boğulmamaq üçün binanı pəncərələrdən tərk etmək məcburiyyətində qalıb, tüstüdən zəhərləndiyi üçün iki müəllimə tibbi yardım göstərilib. Heç kim ciddi xəsarət almayıb, lakin binaya böyük ziyan dəyib və məktəb distant təhsilə keçmək məcburiyyətində qalıb.
Yanğın törətməkdə ittiham olunan şagirdi 2 ildən 8 ilə qədər həbs cəzası gözləyir. Dindirmə zamanı o, səbəbin yanğın siqnalını işə salmaq istəyi olduğunu etiraf edib.
“Cümə axşamı dərslər çox gec bitir, ona görə də o gün evə getmək istəyirdik. Lakin bu, əlbəttə ki, heç də yaxşı fikir deyildi", - deyə o etiraf edib.
Bölmənin digər xəbərləri
