İTALİYA LİVİYAYA KOMPENSASİYA ÖDƏYƏCƏKDİR
AZƏRTAC-ın xüsusi müxbiri xəbər verir ki, İtaliya hökuməti Liviyaya 5 milyard dollar dəyərində kompensasiya ödəmək qərarına gəlmişdir.
Liviyada qısamüdətli səfərdə olan İtaliyanın Baş naziri Silvio Berluskoni Benqazi şəhərində İtaliyanın bu ölkədə müstəmləkə hakimiyyəti dövründə (1911-1942) əhaliyə qarşı törədilmiş haqsızlıqlara görə rəsmi şəkildə üzr istəmişdir.
S.Berluskoni ilə Liviyanın lideri Müəmmər Əl-Qəzzafi arasında bağlanmış sazişə görə, növbəti 25 ildə italiya hökuməti Liviya dövlətinə 5 milyard dollar həcmində kompensasiya ödəyəcəkdir. Ayrılmış vəsait ölkədə həyata keçiriləcək müxtəlif layihələrə yönəldiləcəkdir.
M. Əl-Qəzzafi iki ölkə arasında 40 ildən artıq davam edən mübahisələrə son qoyan sazişin imzalanmasının tarixi hadisə olduğunu bildirmişdir.
1911-1932-ci illərdə 20 mindən artıq liviyalı müqavimət hərəkatı ilə əlbir olmaqda günahlandırılaraq, İtaliya ordusu tərəfindən qətlə yetirilmiş, 100 mindən artıq insan isə ölkənin şərqində yerləşən səhra düşərgələrinə sürgün edilmişdir. İkinci dünya müharibəsində müttəfiq ölkələrin qoşunları tərəfindən azad edilən Liviya 1951-ci ildə dövlət müstəqilliyini elan edənədək BMT-nin protektoratlığı olmuşdur.
Bölmənin digər xəbərləri
