İtaliyanın Lombardiya vilayəti normal həyata qayıtmaq istəyir
Roma, 16 aprel, AZƏRTAC
İtaliyanın koronavirusdan ən çox əziyyət çəkən vilayətlərindən olan Lombardiyanın qubernatoru aprelin 16-dakı mətbuat açıqlamasında hökuməti karantin qaydalarını mayın 4-dən ləğv etməyə çağırıb.
AZƏRTAC xəbər verir ki, qubernator Attilio Fontana Lombardiyanın həddindən çox təcriddə qaldığını vurğulayaraq deyib: “Gələcək qarşısı alınmazdır və biz bu virusla yaşayaraq irəliyə baxmağa məcburuq. Vaksin hələ də yoxdur, biz isə həyatımızı yoluna qoymalıyıq”.
Qubernator təcriddən mərhələli şəkildə də olsa çıxmağın labüdlüyünü vurğulayıb.
Lombardiya mərkəzi Milan şəhəri olmaqla İtaliyanın ən varlı regionu sayılır. Ölkə üzrə ÜDM-in 22 faizi məhz bur regionun payına düşür. Lombardiya, həmçinin iri turizm və sənaye mərkəzi hesab olunur.
Lakin Milanın meri Cüzeppe Sala bu qərara qarşı olduğunu dilə gətirib. O deyib ki, təcridi aradan qaldırmağın tərəfdarıdır, lakin belə sürətlə əvvəlki tempə qayıtmağı doğru hesab etmir.
Lombardiyada bu günədək 11 min 377 insan virusla bağlı yaranan xəstəliklərdən vəfat edib. Ümumilikdə İtaliya üzrə koronavirusdan 21 min 645 nəfər ölüb.
Aygün Əliyeva
AZƏRTAC-ın xüsusi müxbiri
Roma
Bölmənin digər xəbərləri
