İxtisaslı mütəxəssis çatışmazlığı Gürcüstanın əmək bazarında böhrana səbəb olub
Tbilisi, 1 may, AZƏRTAC
İşsizlik uzun illərdir ki, Gürcüstan üçün əsas problem olub. Eyni zamanda, ixtisaslı mütəxəssis çatışmazlığı səbəbindən əmək bazarında böhran yaşanır.
AZƏRTAC xəbər verir ki, bu barədə Gürcüstan Biznes Assosiasiyasının (GBA) hesabatında bildirilib.
Hesabatda qeyd olunur ki, GBA əmək bazarında araşdırmalar aparıb. Araşdırmaların nəticələrinə görə ölkədəki bizneslərin 67 faizi peşəkar kadr çatışmazlığından əziyyət çəkir. Kolleclərdə və yenidənhazırlama proqramlarında tələbələrin sayının artmasına baxmayaraq, bir sıra sahələrdə vakant yerlər tələb olunmur.
“Bu sahələrin bəziləri tikinti və kənd təsərrüfatıdır. Yeni texnologiyalar və avadanlıqlar peşəkar yanaşma tələb edir. Şirkətlər əsasən, Azərbaycan, Türkiyə və Ukraynadan, eləcə də digər ölkələrdən olan əcnəbiləri işə götürməli olurlar. Lazımi bacarıqlara malik olan gürcülərin özləri vətənindən daha çox maaş alan başqa ölkələrə getməyə üstünlük verirlər”, - deyə hesabatda bildirilir.
Araşdırmaya görə, gürcü şirkətləri yerli mütəxəssislərə kifayət qədər maaş vermir. Mütəxəssislər deyir ki, hazırda Gürcüstanın əmək bazarında akademik təhsildən daha çox praktiki peşəkar bacarıqlara tələbat var.
Milli Statistika Xidmətinin məlumatına görə, Gürcüstanda qadınlar arasında məşğulluq səviyyəsi artsa da, kişilər arasında işsizlərin sayı yüksəkdir.
Tbilisi
Bölmənin digər xəbərləri
