Bakı, 5 mart, AZƏRTAC

Bakıda keçirilən akrobatika gimnastikası üzrə dünya yaş qrupları yarışlarında iştirak etmək bizə gələcək üçün stimul və böyük təcrübədir.

Bunu AZƏRTAC-a yarışların iştirakçıları, kanadalı gimnastlar Kristian Dayana və Emerson Vonq deyib.

“Bu gün biz ikinci çıxışımızı da uğurla nümayiş etdirdik. Nəticə bizi sevindirdi. Yarışlar çox maraqlı keçir. Arenada gözəl şərait yaradılıb. Burada bir çox ölkələrdən idmançılar var. Təəssüf ki, digər komandalarla ünsiyyət üçün vaxtımız olmayıb. Komandamızda xoş mühit hökm sürür, hamı yaxşı nəticələrə köklənib, idmançılarımız bir-birini dəstəkləyir”, - deyə gimnastlar bildiriblər.

Qeyd edək ki, martın 6-dək davam edəcək akrobatika gimnastikası üzrə 12-ci dünya yaş qrupları yarışlarında 24 ölkədən 438 gimnast iştirak edir. Yarışda idmançılar 12-18 və 13-19 yaş qrupları üzrə kişi, qadın və qarışıq cütlüklər, kişi qrupları, qadın qrupları balans, temp və qarışıq hərəkətlər proqramında qüvvələrini sınayırlar.

Azərbaycanı yarışda 12-18 yaş kateqoriyasında Rəsul Seyidli, Rəvan Zeynallıdan ibarət kişi cütlüyü, Nəzrin Qasımova, Xanım Məmmədzadədən ibarət qadın cütlüyü, Milana Əliyeva, Nizam Xamidulindən ibarət qarışıq cütlük, Anahita Bashiri, Zəhra Rəşidova, Nəzrin Zeyniyevadan ibarət qadın qrupu və 13-19 yaş kateqoriyasında Leyla Bəşirova, Nəzrin Fərmanova, Mənsumə Məmmədzadədən ibarət qadın qrupu təmsil edir.