KEÇƏN İL GORANBOYLULAR ÜÇÜN UĞURLU OLMUŞDUR
Goranboy, 21 fevral (AZƏRTAC). Goranboy rayonunda 2008-ci ilin yekunları və 2009-cu ildə qarşıda duran vəzifələrə həsr olunmuş müşavirə keçirilmişdir.
Müşavirədə rayon icra hakimiyyətinin başçısı Elşən Abasovun bir il ərzində görülən işlərə dair mərüzəsi dinlənilərək müzakirə edilmişdir.
Məlumat verilmişdir ki, son 5 ildə regionların social-iqtisadi inkişafı Dövlət Proqramına uyğun olaraq rayon ərazisində yollar təmir edilmiş, 7 kənddə körpü salınmış, Goranboy şəhərin küçə və meydanları abadlaşdırılmış, rayon mərkəzində tikintisinə başlanılmış “Gənclər parkı”nın, buradakı müasir üslublu binanın, rəsm qalereyasının və çay evinin tikintisi başa çatdırılmışdır. Ötən il sahibkarlığın inkişafı və yeni iş yerlərinin açılması istiqamətində aparılan işlər uğurla davam etdirilmişdir. Goranda “Gilan Holdinq”in gips-karton zavodu inşa olunmuşdur. Regionda analoqu olmayan kalsid istehsalı zavodunun tikintisinə başlanılmışdır. Kənd təsərrüfatı artan templə inkişaf etmişdir. Bir ildə 45 milyon 32 min manat gəlir əldə edilmişdir ki, bu da 2007-ci ildəkindən 1,1 dəfə çoxdur.
Müşavirədə qeyd edilmişdir ki, 2004-2008-ci illər ərzində rayonda yeni yaradılan istehsal müəssisələri, ticarət və xidmət obyektləri hesabına 11 min 526 yeni iş yeri açılmışdır. Bunun 4997-si daimidir. Rayon üzrə orta aylıq əmək haqqı 155 manat təşkil etmişdir ki, bu da 2003-cü il səviyyəsindən 5,3 dəfə çoxdur. Adambaşına düşən gəlir 2007-ci ilə nisbətən 57 manat artmışdır.
Məruzəçi və çıxış edənlər iqtisadiyyatda əldə olunan uğurların digər sahələrin də inkişaf etdirilməsində mühüm rol oynadığını bildirmişlər. Belə ki, bu inkişaf təhsil və səhiyyəyə də öz müsbət təsirini göstərmişdir. Son 5 ildə rayonda 3625 yerlik 19 məktəb binası tikilərək istifadəyə verilmiş, məktəblərin maddi-texniki bazası xeyli möhkəmləndirilmişdir. Hesabat ilində şəhər uşaq incəsənət məktəbi üçün yeni bina, Səfikürd kənd uşaq musiqi məktəbi üçün 8 otaqdan ibarət əlavə tədris korpusu tikilmişdir. Yeni məktəb tikintisi cari ildə də davam etdirilir. Hazırda Qızılhacılı qəsəbəsində 360 yerlik yeni məktəb binasının inşasına başlanmışdır. Əhaliyə səhiyyə xidmətinin səviyyəsini yüksəltmək məqsədi ilə mərkəzi xəstəxanaya müasir diaqnostika aparatı, 2 ədəd sanitar maşını və digər inventarlar alınmışdır. Xəstəxananın travmatologiya, rentgen və doğum şöbələri əsaslı təmir edilmişdir. Nizamı və Qarqucaq kəndlərində həkim məntəqələri tikilərək istifadəyə verilmişdir.
Müşavirədə rayon paylayıcı elektrik şəbəkəsinin yarıtmaz işi ciddi tənqid olunmuşdur. Qeyd edilmişdir ki, şəbəkə rayonun bəzi yaşayış sahələrində heç bir səbəb olmadan məhdudiyyətlər tətbiq edir ki, bu da əhalinin haqlı narazılığına səbəb olur.
Prezidentin İcra Aparatının məsul işçisi Niyaz Əliyev, Milli Məclisin deputatı Gültəkin Hacıyeva müşavirədə çıxış edərək respublikamızda, eləcə də Goranboyda qazanılmış uğurlardan danışmış, bu uğurların 2009-cu ildə də davam etdirilməsi üçün qarşıda duran vəzifələri təhlil etmişlər.
İctimai-siyasi həyatda fərqləndiklərinə görə bir qrup rayon sakininə rayon icra hakimiyyətinin fəxri fərmanları təqdim olunmuşdur.
Bölmənin digər xəbərləri
