Keçi südü bir çox xəstəliklərin dərmanıdır
Bakı, 30 iyun (AZƏRTAC). Keçi südünün bəsləyici xüsusiyyətləri əsla inək südündən geri qalmır, əksinə, bir sıra unikal xassələrinə görə onu üstələyir.
Alimlər hesab edirlər ki, keçi südü inək südü ilə müqayisədə insan orqanizminin fizioloji xüsusiyyətlərinə daha uyğundur. Keçi südünün tərkibi qiymətli bəsləyici maddələrlə, o cümlədən kalsium, fosfatlar, A və B vitaminləri ilə zəngindir və inək südündən daha asan həzm olunur.
Keçi südündə piy və proteinlərin strukturu ana südünə maksimum yaxındır. Buna görə də inək südünə nisbətən xeyli az problem yaradır, allergiya reaksiyalarına və həzmin pozulmasına səbəb olmur. Allergiyadan əziyyət çəkən insanlar adətən inək südünün proteininə(zülalına) qarşı daha həssas olurlar. Keçi südünün tərkibində isə proteinin asanlıqla həzm olunan növü vardır. Üstəlik, keçi südündə piy molekulları daha xırdadır və bir-birinə yapışmır. Bu da keçi südünün insan orqanizmi tərəfindən asanlıqla həzm olunmasına imkan verir.
Tibb işçiləri keçi südünün unikal müalicəvi xüsusiyyətlərə malik olduğunu bildirirlər. Keçi südü artritlərin, oynaq və dəri xəstəliklərinin müalicəsinə kömək edir. Piy turşuları ilə zəngin olduğu üçün bir çox digər xəstəliklərin, o cümlədən öd kisəsi daşının, mədə pozuntusunun, kista və fibromaların, uşaq epilepsiyasının müalicəsində faydalıdır, habelə artıq xolesterinin orqanizmdən xaric edilməsinə şərait yaradır.
Bölmənin digər xəbərləri
