Keçmiş məcburi köçkün: 30 ildən sonra biz xalq olaraq qələbə sevincini yaşadıq
Bakı, 24 noyabr, AZƏRTAC
Ali Baş Komandan İlham Əliyevın rəhbərliyi ilə Azərbaycan Ordusu torpaqlarımızı düşmən tapdağından azad etdi və ölkəmizin ərazi bütövlüyü tam bərpa olundu. Məhz bu tarixi Qələbənin nəticəsidir ki, bu gün biz doğma yerlərə qayıdırıq. Ailəmlə birlikdə bu gün çox sevincliyik.
Bunu AZƏRTAC-a müsahibəsində noyabrın 24-də Bakıdan Füzuli şəhərinə yola salınan keçmiş məcburi köçkün Eldəniz Mehraliyev deyib.
Birinci Qarabağ müharibəsində ağır döyüşlərdə iştirak etdiyini bildirən həmsöhbətim söyləyib ki, ötən illər ərzində hər gün torpaqlarımızın azad olunacağını gözləyib. “Düşünürdüm ki, mütləq bir gün qələbə bizim olacaq. Şükürlər olun ki, 30 ildən sonra biz xalq olaraq qələbə sevincini yaşadıq. Bizə bu sevinci yaşadan Ali Baş Komandanımıza minnətdarlığımı bildirirəm. Torpaqlarımızın azadlığı uğrunda canından keçmiş şəhidlərimizə Allahdan rəhmət, qazilərimizə cansağlığı diləyirəm”, - deyə həmsöhbətim bildirib.
Bölmənin digər xəbərləri
