Kimya İnstitutunun doktoranturasında təhsil almaq istəyən gənclərin sayı artıb
Bakı, 26 may, AZƏRTAC
Elm və Təhsil Nazirliyinin Kimya İnstitutunda doktorantura təhsili almaq istəyən gənclərin sayı artıb.
AZƏRTAC xəbər verir ki, bu barədə məlumat verən institutun direktoru səlahiyyətlərini icra edən professor Əfsun Sucayevin sözlərinə görə, bu il 7 ixtisas üzrə 21 yer ayrılıb. Sənəd qəbulu elanından ötən 10 gün müddətində artıq 20-dək namizəd sənədlərini uyğun ixtisaslar üzrə təqdim edib: “Əvvəlki illərdə bir ixtisasa çətinliklə bir iddiaçı sənəd verirdisə, indi elə ixtisaslar var ki, ayrılan yerlərin sayından 2 dəfə çox sənəd təqdim edənlər var. Bu o deməkdir ki, bu il seçim zamanı güclü rəqabət yaranacaq”.
“Kimya İnstitutunda doktorantura təhsilinə gələn oğlanları heç bir maneə olmadan xaricə, dünyanın aparıcı elmi mərkəzlərinə təcrübə keçməyə göndərə bilərik. Onlar xaricdə bilik və tədqiqat bacarıqlarına yiyələndikdən sonra instituta böyük töhfələr verəcəklər”.
Xatırladaq ki, 2026-cı il üzrə doktoranturaya sənədlərin qəbulu iyunun 9-dək “Təhsil Mərkəzləşdirilmiş İnformasiya Sistemi” (TMİS) vasitəsilə elektron qaydada həyata keçirilir. Qəbul olmaq istəyən şəxslər https://portal.edu.az veb-səhifəsində qeydiyyatdan keçməli və tələb olunan sənədləri portala yükləməlidir.
Əlavə məlumat üçün Kimya İnstitutunun Elmi kadrların hazırlığı sektoruna müraciət etmək olar.
Bölmənin digər xəbərləri
